Betele yidi diambu mosi di ndinga Ebeleo yo yintia tuba “Nzo yi Nzambi.” (Thonono 28:17, 19, noti, NW) Dizina beni difueni sadulu mu diambu di tubila zinzo zio Zimbangi zi Yehova babongisa mu zitsi ziwombo, bibuangu beta tuadisila ayi bongisila kisalu ki samuna. Kimvuka kintuadisi kieta sadila ku biro kinene ki Zimbangi zi Yehova kioki kidi ku zunga ki New York, ku États-Unis, ayi kuna beta tuadisila bisalu bi zifiliale zioso zidi mu zitsi ziwombo. Bobo beta sala kuna babokudulu bawu boso dibuta di Betele. Bobuawu kuandi bukadila mu dikanda, baphangi zi Betele beta vuanda ayi sadila va kimosi, dia va kimosi, longuka Bibila va kimosi mu lubundanu.—Nkunga 133:1.

Kidi buangu kimosi ki mfunu wombo koko baphangi beta kukivanina mu ntima mosi. Mu Zibetele zioso, baphangi ba bakala ayi banketo beta kukivana buwombo mu thangu zioso mu diambu di vanga luzolo lu Nzambi, ayi mu diambu di mambu matadidi Kimfumu ki Nzambi. (Matayi 6:33) Bafutungu ko, vayi beta kubavana zinzo zi vuanda, bidia, ayi mua mbongo mu diambu di dukisa minkinza miawu mi fiotifioti. Kadika mutu ku Betele widi ayi kisalu kio bamvana, yilenda ba ku biro, ku kikuku voti mu bongisa zimeza zi dila. Bankaka beta sala ku buangu kibimisina minkanda mu masini, ayi kubika miawu; bankaka beta bongisa bivinga, beta sukula minledi, beta bongisa masini, voti mambu mankaka.

Kidi buangu ko kueta sadulu bisalu bi ngolo mu diambu di thombokolo yi kisalu ki samuna Kimfumu. Dikanu di thethe di Betele didi ti kiedika ki Bibila kienda kudi batu bawombo. Mu kifuani, mua nkanda wawu simbidi wulenda sadisa batu balonguka kiedika ki Bibila. Wusonimina mu lutuadusu lu Kimvuka kintuadisi, ayi wu tindu mu nzila yi Internet kudi zikhama zi ziekipi zi mimbangudi bobo badi mu nza yimvimba. Wubimusu mu masini momo meta bimisa minkanda miwombo mu thangu yi fioti; wutindu mu bimvuka viokila 110000. Dibuta di Betele dieta vana mioko mu bisalu bioso biobi, ayi yawu yilembo tudi ti kisalu ki samuna nsamu wumbote wo wufueti salama nsualunsualu wudedakana.—Malako 13:10.

• Banani beta sala ku Betele, ayi lusadusu mbi beta baka e?

• Kisalu mbi kioki kifueti salama nsualunsualu kioki kadika mutu widi ku Betele keta buedila mioko?