Beˬdeˬlaˇ nymˇ jiˇ deuˬ gaˇ yaw myaˬ paw dzeˇ mˇ luꞈ meh. Yawˬ ha-euˬ miˇ k’ahˬ hawˇ-eu yaw myaˬ k’ahˬ laꞈ k’oeˇ jaˆ-eu tsaꞈ gaˬ-eu gaˇ-ahˇ haw piˇ nehˬ-eu meh. Aˬ yawꞈ maꞈ naˇ, dawˬ yuˇ paˇ gaˇ maˬ ehˇ, paˇ dmˬ jahˇ doˆ gaˇ maˬ ehˇ, paˇ dmˬ guꞈ gaˇ maˬ ehˇ, aˇ boꞈ paˇ dmˬ yuˇ taˬ gaˇ maˬ ehˇ, aˇ baˇ hawˇ-eu teˇ saˇ jahˇ doˆ gaˇ maˬ ehˇ caw ba luꞈ-eu meh. Maˬ ngeuˇ naˇ k’awꞈ, gaˇ yawˬ deuˬ yawˬ-ahˇ mˇ luꞈ meh.

Saˇ naˇ Gawˬ miˬ tiꞈ deuˬ, gaˇ deuˬ-ahˇ haw piˇ-eu meh. Uˆ lahˇ-eu aˇ muˇ naˇ, Saˇ naˇ laꞈ k’oe jaˆ-eu gaˇ deuˬ-ahˇ bi haw piˇ-eu g’aˇ duˬ, Gawˬ miˬ tiꞈ deuˬ-ahˇ biˇ nehˬ taˬ-euˬ meh. Gawˬ miˬ tiꞈ heu laꞈ k’oeˇ, noeˬ dahˇ doe laˇ-euˬ aˬ yuiꞈ aˬ tsu smˇ g’aˬ maˬ ngeuˇ naˇ dzehˬ ni jawˇ-eu meh. Gawˬ miˬ tiꞈ deuˬ naˇ, aˬ yawꞈ maꞈ-ahˇ bi haw piˇ taˬ-euˬ miˇ k’ahˬ deuˬ, huiˬ laˇ mahˇ laˇ nga laˬ maˬ ngeuˇ naˇ gaˇ kawˆ doˆ nga laˬ lehˇ, Uˆ lahˇ-eu aˇ muˇ-ahˇ ya tsaꞈ gaˬ nehˬ-eu meh. Heu loꞈ-ehˇ tsaꞈ gaˬ-eu heu naˇ, keuˆ laˇ-eu aˇ muˇ-euˬ mehˬ bawˬ hawˇ-eu huiˬ-eu mehˬ bawˬ-ahˇ, Uˆ lahˇ-eu aˇ muˇ deuˬ aˬ jeˬ jeˇ-euˬ gaˇ kawˆ bi dawˆ ahˇ paˬ nga lehˇ, caw ba nehˬ-eu jeˬ pyeuꞈ meh. Uˆ lahˇ-eu aˇ muˇ-euˬ dah zaˇ deuˬ naˇ, biˇ doˆ taˬ-euˬ Saˇ naˇ-ahˇ tiˬ k’ehˬ maˬ kaˬ laˇ laˇ-ehˇ, Saˇ naˇ aˬ yuiꞈ aˬ tsu deuˬ ya mˇ-eu gaˇ deuˬ-ahˇ mehˬ nehˬ laˇ-eu meh. (Dawˬdaˬ 11:14) Teu ngeh yamˬ-ahˇ, Saˇ naˇ heu laꞈ k’oeˇ jawˇ luꞈ-eu yawˬ g’aˬ na luꞈ-ahˇ g’aˬ biꞈ-eu g’aˇ duˬ, Uˆ lahˇ-eu aˇ muˇ-euˬ dah zaˇ deuˬ naˇ, huiˬ-eu mehˬ bawˬ tiˬ hmˬ jahˇ-eu meh.

Aˇ muˇ deuˬ-ahˇ caw ba nehˬ-eu meh. Biˇ doˆ taˬ-euˬ Saˇ naˇ-ahˇ jawˇ-eu mehˇ nmˇ deuˬ naˇ, aˇ muˇ yaw shuiꞈ beh gaˇ loˬ-eu jeˬ dawˬ tawˆ luꞈ-ahˇ, caw ba nehˬ-eu meh. K’oeˇ naˇ, Saˇ naˇ-euˬ g’aꞈ tsahˬ laꞈ k’oeˇ jawˇ-awˇ neh gaˇ mˇ luꞈ-eu huˬ mehˬ mehˬ-eu deuˬ, miˇ shiˬ naˬ liˬ, aˇ maꞈ-ahˇ sheuˬ g’eh-eu g’aˬ heu deuˬ-ahˇ k’awꞈ, aˬ yawꞈ maꞈ ya mˇ-eu gaˇ deuˬ-ahˇ mehˬ nehˬ-eu meh. K’oeˇ naˇ, huiˬ-eu mehˬ bawˬ deuˬ-ahˇ lehˬ hmˬ nehˬ-awˇ neh, Bawˬ dzaˬ nymˇ yaw shuiꞈ tsoˆ gaˇ maˬ ehˇ, aˇ muˇ deuˬ loˬ-eu aˇ boꞈ deuˬ sha ha gaˇ maˬ ehˇ haw piˇ nehˬ-eu meh. Saˇ naˇ heu hmˬ-ahˇ k’aˇ mˇ k’aˇ shaˇ luꞈ-eu jeˬ dawˬ tawˆ luꞈ, tsaꞈ gaˬ-eu gaˇ-ahˇ yaw muiˬ-ehˇ mˇ luiˆ nya ni, caw ba nehˬ-eu jeˬ pyeuꞈ meh.—1 Gawˇliˬtu 14:33, 40.

• Saˇ naˇ Gawˬ miˬ tiꞈ, Uˆ lahˇ-eu aˇ muˇ-ahˇ aˬ joˆ-ehˇ caw ba nehˬ-eu nga?

• Saˇ naˇ aˬ jeˬ jeˇ gaˇ-ahˇ haw piˇ luꞈ-eu nga?