Betɛli lɔfuɛ’m be di junman wafawafa. Be nian nvle kun annzɛ nvle kaka nun jasin fɛ’n bolɛ junman’n su. Wie’m be kaci fluwa mun aniɛnaniɛn’m be nun, be yi fluwa mun, yɛ be di junman lika nga be tian fluwa sɔ’m be nuan lɔ’n. Wie mun ekun be yi CD nin DVD, ɔ nin kasɛti mun, annzɛ be yo ninnge wie mun man lika nga be o lɔ’n i nunfuɛ mun.

Aniaan nga be nian jasin fɛ’n bolɛ junman’n su. Betɛli kwlaa nun’n, asɔnun kpɛnngbɛn nsan annzɛ nsan tra su mɔ be ɲin w’a ti Ɲanmiɛn sulɛ nun kpa’n be o komite kun nun. Be yɛ be nian Betɛli lɔ junman’n su ɔ. Ɔ maan wafa nga Zoova i Lalofuɛ’m be di Ɲanmiɛn junman’n nvle kun nun’n, be bo su kle be anuannzɛ’n Ɲrun dinfuɛ mun. Sɛ kusu ndɛ wie yɛ ɔ tɔli nvle sɔ’n nun’n, ajalɛ kunngba’n yɛ be fa ɔ. Be anuannzɛ’n i Ɲrun dinfuɛ’m be jran ndɛ sɔ’m be su be yi fluwa annzɛ be kan be su ndɛ aɲia mun nin aɲia dandan’m be bo lɔ. Blɛ sunman nun’n, be janunfuɛ’m be ko nian be nga be di junman Betɛli’m be nun’n, be osu. Kɛ be ju lɔ’n, be uka be nga be di junman Betɛli komite’n nun’n naan b’a di be junman’n i kpa. (Nyanndra Mun 11:14) Kpɛkun be ijɔ nzra nun fa wla aniaan nga be o Betɛli’n i asa’n su lɔ’n be fanngan.

Be nian be lika’n nun asɔnun’m be lika. Sɛ ɔ ti mɔ be taka asɔnun uflɛ kun’n, aniaan wie mɔ be sieli be sɔ Betɛli lɔ’n yɛ be mɛn i wun atin ɔn. Asa kusu’n, be siesie atin bofuɛ, ngaliɛ difuɛ, ɔ nin akpasua sunianfuɛ’m be junman’n. Kpɛkun ɔ siesie aɲia dandan mun, yɛ ɔ nian aɲia sua’m be kplanlɛ’n su. Asa ekun Biblu’n nin fluwa nga asɔnun’m be sa mian be wun’n, ɔ yo maan be fa ko man be. Betɛli lɔ junman’n ti maan jasin fɛ’n bolɛ junman’n yoman sukusuku.​—1 Korɛntfuɛ Mun 14:33, 40.

• ?Wafa sɛ yɛ Betɛli lɔ komite’m be uka Zoova i Lalofuɛ’m be anuannzɛ’n i Ɲrun dinfuɛ mun ɔn?

• ?Junman benin yɛ Betɛli lɔfuɛ’m be nian su ɔ?