Chón ewe familien Bethel ra féri ekkewe sókkópaten kinikinin pekin angang lón Bethel pwe repwe túmúnú ewe angangen afalafal lón eú are fite fénú. Ekkóch ra fiti ekkewe kúmien afféú puk, angang lón leenien peres puk, ochu me pirapani puk, fér dvd me cd, are túmúnú pwal ekkóch angang fán iten ekkewe leeni mi nóm fán túmúnúan.

Eú Kúmiin Chón Túmúnú Keangen Ofesilap. Lón eú me eú keangen ofesilap, a wor ena kúmi mi wor úlúmén are fitemén mwán mi ásimaw mi angangéch ra kefilitá me ren ewe Mwichen Soupwúngúpwúng ar repwe túmúnú angangan. Ena kúmi a kan repot ngeni ewe Mwichen Soupwúngúpwúng usun feffeitáán ewe angang lón ekkewe leeni mi nóm fán túmúnúan, are ika mei wor osukosuk mi piitá. Ekkena repot ra álisi ewe Mwichen Soupwúngúpwúng le apwúngaló met sókkun pwóróus repwe katowu lón néúm kewe puk are lón ekkewe mwich me mwichelap. Chón tupuni ewe Mwichen Soupwúngúpwúng ra kan chuuri ekkewe keangen ofesilap. Ra awora emmwen ngeni ewe kúmiin chón túmúnú ren ifa usun repwe apwénúetá wiser. (Än Salomon Fos 11:14) Lón ena atun, a fis eú mwich mi kkóló aúchean me ewe chón tupuni ena Mwichen Soupwúngúpwúng a eáni afalafal mi apéchékkúla chón ekkewe leeni mi nóm fán túmúnúen ewe keangen ofesilap.

Álillis ngeni ekkewe mwichefel. Ekkewe mwán mi ásimaw lón ewe keangen ofesilap ra apwúngaló fférútáán ekkewe mineféén mwichefel. Ra pwal emmweni ewe angangen pioneer, misineri me ekkewe chónemmwen mi wisen sáifetál, mi nóm fán túmúnúen ena keangen ofesilap. Ra akkóta ekkewe mwichelap, angangen kaútáán ekkewe mineféén Leenien Mwich, me ppii pwe ekkewe puk repwe titiiló ngeni ekkewe mwichefel, pwe repwe ataweei minne ra osupwang wóón. Meinisin angang lón ewe keangen ofesilap ra álisatá kókkótéchún ewe angangen afalafal.​—1 Korint 14:33, 40.

• Ifa usun ekkewe Kúmiin Chón Túmúnú Keangen Ofesilap ra álisi ewe Mwichen Soupwúngúpwúng?

• Ikkefa ekkewe angang ewe keangen ofesilap a túmúnú?