Babole̱ ebolo o Mukanjo m’Ebolo, be nde belongi ba mbia ma Bete̱l. Ba masue̱le̱ ebol’a dikalo o ekombo ewo̱, to̱so̱ jita. E bolabe̱ bō̱ ná ba be̱ o, mabe̱le̱ ma betukwedi, busise̱ la kalati ya mo̱di, kaka mo̱ mabomba, busise̱ la belēdi tongwea na bedinge̱dinge̱ na be bena ba masengano̱, to̱so̱ bema bepe̱pe̱ be mombweye̱ bekombo ba masue̱le̱no̱.

Mu mombwea ebolo o bekombo ba be̱nno̱ ka m’bē̱. Dibe̱le̱ di Madie̱le̱ di te̱se̱ ná, Bete̱l te̱ e diabe̱le̱ na Dibe̱le̱ di mombweye̱ mukanjo m’ebolo, lena di longedi, o bosadi bwe̱se̱, na batudu balalo bou eyeka. Dibe̱le̱ di mombweye̱ mukanjo m’ebolo so̱ nde di mabīse̱ babo̱ bońaki b’ebolo o ekombo te̱ yena ba mombweano̱, na nje ye̱se̱ ba mabomane̱no̱ ka mako̱bi. Bupisane̱ Milangi mabu nde Dibe̱le̱ di Madie̱le̱ di mapo̱so̱no̱ tema di makwaleano̱ o kalati i maye̱, o ndongame̱n na mako̱to̱ne̱. Dibe̱le̱ di Madie̱le̱ di yo̱ki pe̱ loma ponda iwo̱ bonasango bou bape̱pe̱ o pe̱pe̱le̱ Bete̱l, na wanea mikanjo m’ebolo jongwane̱, o bia bambe̱ m’bē̱ mabu. (Minia 11:14) O bwam ba jembe̱ Mboṅ a Yehova yena mu mukanjo mu mombweano̱, nu munasango a mabola ekwal’a nte̱le̱le̱ o jako̱to̱ne̱ la tobotobo.

Mu masue̱le̱ myemba me̱se̱ me owas’a m’bē̱ mao. O Bete̱l bonasango bō̱ ba be̱n m’bē̱ ma jemea te̱se̱be̱ la myemba ma peńa. Babo̱ pe̱ nde ba madie̱le̱ ebol’a pionie, ya bamuloloma ba mawe̱ o bekombo bepe̱pe̱, na baboledi ba ebondo. Ba mabokise̱ pe̱ mako̱to̱ne̱, ba die̱le̱ pe̱ longa la mandabo ma Janea ma peńa. Ba makasa pe̱ kalati i lomabe̱, nde ba no̱ngo̱ pe̱ bedomsedi ná myemba me̱se̱ mi kuse yi kalati. Nje ye̱se̱ e mabolane̱ o mukanjo m’ebolo ye nde ońola bwam ba ebol’a dikalo o ńai ńangame̱n.​—1 Korinto 14:33, 40.

• Ne̱ni Dibe̱le̱ di mombweye̱ Mukanjo m’Ebolo di masue̱le̱no̱ Dibe̱le̱ di Madie̱le̱ e?

• Njika mbe̱ mukanjo m’ebolo mu be̱nno̱ e?