Wɔakyekyɛ Bethel ebusuamufo dwumadzi ahorow no mu dze hwɛ ma asɛmpakã edwuma no kɔ do wɔ ɔman kor anaa dodow bi mu. Binom kyerɛ kasa ahorow ase, tsintsim magazine ahorow, wɔyɛ nwoma ahorow, anaadɛ wɔhwɛ ma wɔdze nwoma ahorow mona. Afofor so yɛ edwuma wɔ bea a wɔyɛ video anaa dza wɔbɔ tsie ho edwuma, anaadɛ wodzi ndzɛmba afofor a ɔhyɛ hɔn nkorbata no ase no ho dwuma.

Nkorbata Egyinatukuw na wɔhwɛ dwumadzi no do. Akwankyerɛ Kuw no dze edwumayɛbea nkorbata dwumadzi hyɛ mpanyimfo baasa anaa dza wɔbor dɛm a hɔnho awea nsa, na hɔn na wɔkã bɔ mu yɛ Nkorbata Egyinatukuw no. Nkorbata Egyinatukuw no dze ɔman biara a ɔhyɛ hɔn ase no nkɔenyim a wonya, nye nsɛndzendzen a wohyia biara ho amandzɛɛbɔ kɛma Akwankyerɛ Kuw no. Dɛm amandzɛɛbɔ ahorow yi boa Akwankyerɛ Kuw no ma osi nsɛm a ɔsɛ dɛ daakye wosusũ ho wɔ asafo nwoma ahorow mu, asafo nhyiamu nye ehyiadzi ahorow ase no ho gyinae. Wɔtaa soma Akwankyerɛ Kuw ananmusifo ma wɔkɛserasera nkorbata ahorow no, na wɔma Nkorbata Egyinatukuw no akwankyerɛ ma wɔdze yɛ hɔn dwumadzi no. (Mbɛbusɛm 11:14) Wɔyɛ dwumadzi soronko bi ho nhyehyɛɛ a, Akwankyerɛ Kuw ananmusinyi no ma ɔkasa dze hyɛ enuanom a wɔtsetse nkorbata no ne nsaasesin mu no dzen.

Wɔdze mboa ma asafo ahorow no. Enuanom mbarimba binom wɔ edwumayɛbea nkorbata hɔ a hɔn asodzi nye dɛ wɔbɔhwɛ apen do ma wɔaatsew asafo afofor. Binom so hwɛ akwampaaefo, asɛmpatserɛwfo nye amansin do ahwɛfo a wɔhyɛ hɔn nkorbata no ase no dwumadzi ahorow do. Afofor so yɛ ɔmansin nye ɔmantɔw ehyiadzi ahorow ho nhyehyɛɛ, wɔhwɛ ma wosisi Ahendzi Asa afofor, na wɔhwɛ ma wɔdze asafo ahorow no nwoma a wohia kɛma hɔn. Edwuma biara a wɔyɛ wɔ nkorbata hɔ no boa ma asɛmpakã edwuma no kɔ do esiado esiado.​—1 Corinthfo 14:33, 40.

• Ebɛn kwan na Nkorbata Egyinatukuw no fa do boa Akwankyerɛ Kuw no?

• Asodzi ahorow bɛn na wɔhwɛ dzi ho dwuma wɔ edwumayɛbea nkorbata hɔ?