Ɓeynguure Bayti’iila kala no gollude e birooji buy, hiɓe kippi fii golle waajagol ngol e leydi ka ɓe woni ɗon maa e leyɗe buy. Woɓɓe ko waylooɓe, woɓɓe no gollude ka muulngo, woɓɓe ko haɓɓugol defte, woɓɓe kippa ka defte den maretee ton, woɓɓe waɗa kaseetiiji, CD, DVD e piiji wano non.

Ko Mojobere kippunde fii nguu waaju. Hikiiɓe ka fewjoore ɓen no halfini ɗee golle waajagol ngol ndee mojobere nde ardotooɓe tato maa nayo, noddaande Mojobere kippunde fii golle waajotooɓe. Ɓee ardiiɓe halfinaaɓe golle ɗen, ko kamɓe humpitata Hikiiɓe ka fewjoore ɓen si golle ɗen no yaarude yeeso e kala ko woni e feƴƴude. Ko ɗun wallata ɓe fii no ɓe anndira honno ɓe winndirta defte goo fii waajagol ka pottital amen e ka mottondiral amen. Lontiiɓe Hikiiɓe ka fewjoore ɓen no nulee wonnde fii wallitagol mojobere kippunde fii golle waajotooɓe no ɓe ɓeydira wakkilaare (Tindi 11:14, TMN). Lontiiɗo ɲiiɓirde nden jonnay waaju fii mo kala no ɓeydira wakkilaare ka o woni ɗon.

Hiɓe tammbitii mofte buy. Wonuɓe ɓen ka suudu yiilirdu ko kamɓe woni fii sincugol mofte goo. Hiɓe kippi kadi golle ardiiɓe fii ka waajagol, fii imminaaɓe e fii aynooɓe nokkuure. Hiɓe kippi kadi fii mottondire e darnugol Fottirɗe Seedeeɓe Yahuwah ɓen e fii senndituglol defte cewɗe ɗen ka mofte. Kala golle waɗeteeɗe ka suudu yiilirdu ko fii nguu waaju no yaara yeeso no haaniri non. — 1 Korenti 14:33, 40.

• Ko honno mojobere kippunde fii waajagol ngol wallirta Hikiiɓe ka fewjoore ɓen ?

• Honɗun e golle wona e waɗeede ka suudu yiilirdu ?