Betɛɛli mu nua da kóló tamaa kɛ yɛ hwilɛn na Yálá lawoo laa həli mɛni ɓa lɔi tɔnɔ hu, awala kɛtii lɔi tamaa hu. Daɠaa kaa a hɛɓɛ hu woo pɛɛn nua (woo takpɛliɠaa hu), daɠaa diɛ hɛɓɛ kpɛtɛ maɉin ma, daɠaa diɛ hɛɓɛ laŋan gee ɓa, daɠaa diɛ ɉɛɓɛɠaa laalɛ, daɠaa diɛ filiməɠaa kpɛtɛ, daɠaa diɛ woo həɠə ɓo kɛ. Da yili kəlee kɛ Yálá lawoo laa həli mɛni ɓa.

Filiyali Tənəndɔɔ nua ɓə da gólóɠaa tii mɛi kaa. Ɲɛi tɔwɔ nua da filiyali tɛi-tɛi kalihwaɓo filiyali Tənəndɔɔ nua diɛ. Filiyali tənəndɔɔ nua tii da kɛ a kalaɉon nwɛlɛɛɠaa haaɓa, awala kɛtii di tɛɛ haaɓa hu. Pələi Yálá lawoo laa həli mɛni a kɛ tɛi la tɔwɔ lɔiɠaa hu, filiyali tənəndɔɔ nua da yili hukulɔ Ɲɛi tɔwɔ nua diɛ. Mɛni wala-wala yii da gaa di kɛ kóló hu, da ɉukulɔ nwɔnɔ. Di wɔ kwəlanmo a kpɔnmaa tɛɛ Ɲɛi tɔwɔ nua pɔ, ə gɛ yii Zehova ŋɔ Kəlaɠaa maakpaan gaa ma nɔiɠaa tii hu, di yili pɛɛn kalan ɉɛɓɛɠaa hu, awala kɛtii di galan diɛ ŋaakpɔn gɛ pɛlɛɠaa mu da ŋaakpɔn gbea-kpea diɛ. Ɲɛi tɔwɔ nua ɲɛi kɔuɠaa da kɛ pai filiyaliɠaa hu kɛlɛ-kɛlɛ diɛ naa tənədɔɔ nua hwaŋalɔ di kɛ kóló maa mɛni ɓa (Haŋɔn 11:14, TMN). Ɲɛi tɔwɔ nua ɲɛi kɔu a pa lɔi ta hu, a kalan gɛ naa kalan nea kəlee hwaŋalɔ mɛni ɓa.

Filiyali kəlee a ŋɔ lɔi hu kalangbɔnŋaa hwaŋalɔ. Nan nonnii hinaa kaa filiyaliɠaa hu, diɛ ɓə da kalangbɔn ninɛɠaa maa mɛni hee gbanŋa. Diɛ di ɲɛi pili pələkulɔnua da nwea pələi kalan gɛ nua ə lɛɛ koɓi pɛlɛɛ mɛi kaa nua kɛ kóló hu. Diɛ ɓə nwɔnɔ da ŋaakpɔn gbea-kpea maa mɛni hee gbanŋa, diɛ ŋaakpɔn gɛ pɛlɛɠaa tɔɔ mɛni ɲɛi kulɔ, ə lɛɛ diɛ gɛ pələ kwɛli ma ɉɛɓɛ yiliɠaa diɛ həli galangbɔnŋaa hu a nɛlɛɛ, galan nea maakpaan gbɛɛ mɛni ɓa. Gólóɠaa kpɔ da gɛ filiyaliɠaa hu, da gəlee kɛ Yálá lawoo laa həli mɛni ɓa yɛlɛ tɛtɛ, puɉu túwɔ́ hwa kɛ ɉu. — Kɔlɛntə dɔlɔɔ 14:33, 40.

• Filiyali tənəndɔɔ nua da kpɔnmaa tɛɛ ləi Ɲɛi tɔwɔ nua pɔ ?

• Kóló ləkɛɛɠaa ɓə filiyali tənəndɔɔ nua da gɛ ?