Dhbho ɔˈ kpɛ -duuˈˈ Betɛɛ cɛ ɛ nʋn. Ʋa ˈˈduɛ -bobhladhbho- ɔˈ dɩ ˈbho ˈbhlʋa ˈdhi, ɛ ˈbhɛɛˈ ɛ ˈye ˈo ˈbhlʋɩ- -duuˈˈ ˈdhi nɩn- -ke. Ʋa za ˈsɛɩ ghluˈ i, ʋa bhlɩˈ ˈdhe maaziin ˈŋwɔn, ʋa poɛ ɩanˈ ŋwɩn -da dhueˈ, ʋa pooɩ ɲʋn -jeˈˈ ɩan yea gwlɛ -e ˈbhlʋɩ ˈdhii mun, ʋa nʋɛn video -e dhɩ ɲɔn ɔn poa dheinˈˈ bho -e, ɩmɩn -e dhɩ -duuˈˈ -ˈnɩɩn -e.

Dhbho -aa nʋan an, Betɛɛ ɛˈ jebhopoʋn- -an ŋmʋn ɔɔˈ dɩ. Ʋa nɩɛn ɲankɔʋn- taan, ʋʋ ˈbhɛɛˈ ʋʋ ˈye ˈo izi -ke. Ʋbʋ- -Glibha- aˈ jebhopoʋn- de ˈo -wɛeˈ -ʋa- po dhɩ je bho. Dhɩ aˈ klɛɛ -ɛ zia ˈbho ˈbhlʋa ˈdhi, -ɛ nɩan -bobhladhbho- ɔˈ ɲan mun- sʋn -e dhɩ aˈ klɛɛ -ɩan- ˈˈdua ɲʋn ˈkle ɛ, ʋa ˈtmʋn ɩanˈ dɩ ˈmɛn ˈdhe -Glibha- aˈ jebhopoʋn- bho. ˈˈKunan ʋa poa a, ɔmɔn- -ɔn po -Glibha- aˈ jebhopoʋn- sʋn bho ˈˈdhe dhɩ -ɩanˈ dɩ ʋʋ ˈyea ˈtmʋn ˈdhe ˈsɛɩ ˈdhi -e ˈdhe ˈˈdhruigboɛ- mɩɩnˈˈ -e ˈˈdhruigboɛ- klaeˈˈ ˈmʋn ɛn, ʋa jhibhi. -Glibha- aˈ jebhopoʋn- -ˈnʋn an dhbhoɛ ɲʋn jheejhee -ʋa- jhii Betɛɛ ˈdhii ˈˈdhe -ʋa- ˈˈdu ɩanˈ jebhopoʋn- ˈsrɩn. (Iiˈˈbhlaadhɩ- 11:14) -Bho ɲʋn -ˈnʋn jhi ɛˈ, ʋa bhla -bo -ɔɔ po -bobhlaʋn- nɩan ˈo ˈbhlʋa ˈdhi ˈkpɩ.

Betɛɛ ɛ ˈˈduɛ ɲɔnsoagbi- nɩan gwlɛ ˈdhii aˈ dɩ. -Bho ɲɔnsoagbu- -dhee ˈye da nɩn- ɛnˈ, Betɛɛ ɛˈ jebhopoʋn- -an cɛn ˈo ghlu. -Jezaʋn- -e ˈbhlʋɩ ˈsrɩ ˈˈkpe -muʋn- -e kpɔ ˈˈzaan anˈ ˈˈjhriɛbhoduʋn- -e, ʋbʋ- ˈdhoudhi -ˈˈwe a jhii dhi -wɛeˈ ʋa po dhbho je bho. -Ɛ nɩan ˈˈdhruigboɛ- klaeˈˈ -e ˈBheɔglɔ ɔˈ ˈˈGbi -poɛ- -e ˈsɛɩ ɲɔnsoagbi ˈdhii -kpaa a, ʋbʋ- -a ˈˈdu ɩanˈ dɩ. Dhɩ aˈ klɛɛ -ɛ nʋʋan ˈdhe Betɛɛ ɛˈ, ɩan nʋɛnˈ -bobhladhbho ɔ yea ɲan mun.—1 Kolɛntɩ 14:33, 40.

• Ka Betɛɛ ɛˈ jebhopoʋn- an nʋn -Glibha- aˈ jebhopoʋn sʋn bho -po sʋn -ɛn?

• Dhbho -wɛ Betɛɛ ɛ nʋn -ɛn?