Okaṋepo akehe keṱunḓu rObetel ke ungura motupa pekepeke kutja otjiungura tjokuzuvarisa tji kayende komurungu momahi pekepeke. Tjiva ve ungura movimbumba vyovatoroke, varwe ve pirinda omambo, nokutwa otupa twomambo kumwe, nu varwe ve pwika omambo, nokuungura ozovidio novipuratenwa poo ve vatera noviṋa mbi mavi ṱunu koviungura morukondwa rwawo.

Okomiti yOrutavi rwOmberoo i tjevera oviungura mbi kayenda momberoo ndjo. Orutu Orunane ru yandja ousemba kOkomiti yOrutavi rwOmberoo aihe okuhongorera omaunguriro novitjitwa avihe mbi kayenda porutavi ndwo. Okomiti ndjo i zikama movanene vombongo vetatu poo vokombanda yanao mbe nondjiviro ndja yenena. Okomiti i tjivisa Orutu Orunane ohunga nomakayendero wovitjitwa nouzeu mehi arihe ndi ri kehi yomananeno wayo. Omatjivisiro ngo ye vatera Orutu Orunane okutya kutja omapu yeṋe ngu mave sokupitisa momambo moruyaveze, poo pozombongarero zombongo na pomaworonganeno omanene. Ovakuramenepo vOrutu Orunane aruhe ve hindwa okukavarura otutavi twi nokukayandja omirari vyokuvatera Okomiti yOrutavi okuungura oviungura vyawo momuano omuwa. (Omiano 11:14) Pomaworonganeno wapeke nga pe kara ehungi ndi yandjwa i omukuramene po womberoo ohongora, nu ndi yanḓiparisa avehe mbe ungura kehi yorutavi ndwo.

Okomiti yOrutavi rwOmberoo i vatera ozombongo momahi nge ri kehi yayo. Ovarumendu mbe hongorera oviungura morutavi rwomberoo ve yakura omazikamisiro wozombongo ozombe. Owo wina ve hongorera oviungura vyovakandjira, novahindwa novatarere vorukondwa mbe ri kehi yorutavi rwomberoo ndjo. Owo ve rongerisa omaworonganeno omanene nu ve hongorera omatungiro wOmatuwo omape wOmerikotameneno, nu ve tjita kutja omambo ye hindwe kozombongo nḓu maze ye hepa. Oviṋa avihe mbi ungurwa porutavi rwomberoo vi tjita kutja oviungura vyokuzuvarisa vi yenenisiwe mongaro ombwa.​—1 Ovakorinte 14:33, 40.

• OzOkomiti zOtutavi twOmberoo ze vatera vi Orutu Orunane?

• Orutavi rwomberoo ru nomerizirira yatjike?