Ki dkhot ka Bethel ki trei ha ki tnad bapher bapher, ki peit ïa ka kam ïalap ha kawei ka ri ne bun tylli ki ri. Ki trei kum ki nongpynkyllaktien, ki shon ïa ki makasin, ki suh bad phah ïa ki kot, bad don ruh kiba leh ïa ka audio/video, ne kiba ïarap ha kiwei de ki kam ha kato ka jaka.

Ka Tnad Komiti ka pynïaid ïa ka kam. Ïa man la ka tnad treikam, ka Kynhun Pynïaidkam ka aiti sha ka tnad komiti ba kynthup kumba lai ngut ne tam ki rangbah balang ba tbit ban pynïaid ïa ka kam. Ka komiti ka ïai pyntip sha ka Kynhun Pynïaidkam ïa ka jinglong jingman jong ka kam ha ki jaka kiba hap hapoh jong ka. Ka peit ruh lada mih kino kino ki jingeh. Lyngba kine ki kaiphod ka ïarap ïa ka kynhun pynïaidkam ban rai ïa kino ki phang ba dei ban pyrkhat na ka bynta ki kot kiban pynmih bad na ka bynta ki jingïalang bad ki jingïaseng asembli ban wan. Ki nongmihkhmat jong ka kynhun pynïaidkam ki wan man la ka por sha ki tnad treikam bad ki ai jingïarap ïa ki tnad komiti ban leh bha ïa la ki kamram. (Proberb 11:14) La pynkhreh ïa ka prokram bakyrpang kaba kynthup ïa ka jingkren da u Nongmihkhmat ka tnad treikam baheh duh khnang ban pynshlur ïa kito kiba sah ha kato ka tnad treikam.

Ka jingkyrshan ba ai sha ka balang. Ki para bangeit kiba shim ka jingkitkhlieh ha ka tnad treikam ki mynjur ïa ki jingpynkha balang thymmai. Kine ki para bangeit ki pynïaid ïa ka kam jong ki pioneer, ki mishoneri, bad ki nongsharai jylli kiba shakri ha ki jaka kiba hap hapoh ka tnad. Ki pynkhreh ïa ki jingïaseng asembli bad convention, ki pynïaid ïa ki jingtei ïa ki Ïing Hima bathymmai, bad ki peit ba ki kot ki sla kin poi sha ki balang ban pynbiang ïa ki jingdonkam jong ki. Kiei kiei kiba la leh ha ka tnad treikam ka wanrah ïa ka jingryntih ha ka kam ïalap.​—1 Korinth 14:33, 40.

• Kumno ki Tnad Komiti ki ïarap ïa ka Kynhun Pynïaidkam?

• Kiei ki jingkitkhlieh ba la pynïaid ha ka tnad treikam?