Вефиль сӧбірезіндегілер пір алай нинҷе-де хазнадағы искіріг кирегінің тоғызына хабазып, пасха-пасха пӧліктерде тоғынчалар. Олар пічіктерні тілбестепчелер, журналлар сығарчалар, кинделер итчелер, пічіктер складында тоғынчалар, аудио-видеоматериаллар сығарчалар паза пасха даа аарлығ тоғыстар итчелер.

Филиалның комитеді тоғыстарнаң устапча. Устапчатхан чӧп филиалнаң устирға филиалның комитедіне пирче. Ол комитетте ӱс алай аннаң даа кӧп ус ах сағаллар полчалар. Комитет Устапчатхан чӧпке ол филиал нандырығ тутчатхан хазналарда Хан-ӱлгӱнің кирегі хайди парчатханнаңар паза хайдағ даа пол парчатхан сидіктердеңер искірче. Анзы Устапчатхан чӧпке сығарылчатхан пічіктерде, ӧме чыылығларында паза конгресстерде хайдағ темалар ӱзӱрерін пӧгерге полысча. Устапчатхан чӧп филиалларзар позының представительлерін сыбыра ысча. Ол харындастар филиалларзар киліп, комитеттегі харындастарға оларның тоғызын идерге полысчатхан устағ пирчелер (Притчи 11:14). Филиал устапчатхан чирлерде чуртапчатханнарға ӧнетін тимнелген тоғазығ иртірілче, анда ӧӧн устағның представительі чоох чоохтапча.

Орындағы ӧмелерге полызығ. Филиалдағы нандырығлығ харындастар наа ӧмелер тӧстирдеңер пӧгін алчалар. Ағаа хоза, ол харындастар филиал устапчатхан чирлердегі пионерлернің, миссионерлернің паза аймах кӧрігҷілерінің тоғыстарынаң устапчалар. Олар конгресстер тимнепчелер, Иегованың киречілерінің залларын пӱдірерінең устапчалар паза ӧмелерзер сығарылған пічіктер ызарын кӧрчелер. Филиалда иділчеткен прай киректер искіріг кирегі ипти паза оңдайли парзын тіп иділчелер (1 Коринфтегілерге 14:33, 40).

• Филиалларның комитеттері Устапчатхан чӧптең хада хайди тоғынчалар?

• Нименің ӱчӱн филиаллар нандырығ тутчалар?