O jiphange a sidivila mu Betele, a kalakala mu ididi iavulu, mu kulanga o kikalakalu kia kuboka, kia ixi imoxi mba jixi. Saí iá a sidivila mu ibuka ia kulungulula o madivulu, ku katula jikopia ja madivulu, ku sokejeka madivulu, kubhaka madivulu, kubhanga ji vídeo, mba kulanga ima iéngi ia tokala.

O Kibuka kia Filiiale kiene mu langa o kikalakalu. O Kibuka kia Utuminu, ki bhana o kikalakalu kia kulanga o ikalakalu ku Kibuka kia Filiiale. A tena kukala tufunga tutatu ndenge, a kulu kiavulu mu nzumbi. O kibuka kia filiiale, ki kuatekesa kiebhi kia mu kuenda o ikalakalu ku Kibuka kia Utuminu, mu jixi jene mu langa ni ku ijidisa o maka oso a moneka. Kiki ki kuatekesa o Kibuka kia Utuminu, kuijiia ihi ia tokala kusoneka mu madivulu a ubhe, mu iônge ia ilunga ni mu iônge ia makota. O Kibuka kia Utuminu, kiene mu tumikisa Akunji mu mivu ioso, phala kukunda o jifiliiale ni kubhana itendelesu ku Ibuka ia Jifiliiale, n’a bhange kiambote o ikalakalu iâ. (Jisabhu 11:14) Kioso o mukunji kia kunda, u bhanga diskursu phala kusuínisa o jiphange.

Ki kuatekesa o ilunga. Saí jiphange ku filiiale ala ni kikalakalu kia kuxikina ilunga ia ubhe. Ene ué endesa o ikalakalu ia aboki a thembu ioso, ia a ukunji mu ixi iéngi, ni tufunga tua ilunga a sidivila mu mbambe ia filiiale. Ene a iudika iônge ia makota, endesa o kikalakalu kia kutunga Ididi ia Kubheza ni kuijiia kuila o madivulu a mu kua tumikisa muene mu ilunga, phala kusuua o ibhindamu ia jiphange mu nzumbi. O kikalakalu kioso kiene mu bhanga mu filiiale, ki kuatekesa o kikalakalu kia kuboka ni ki-ende ni uiukilu uoso.—1 Kolindo 14:33, 40.

• Kiebhi o Kibuka kia Filiiale, ki kuatekesa o Kibuka kia Utuminu?

• Ikalakalu iebhi iene mu bhanga mu filiiale?