Bampangi ya Betele kepesaka maboko na badepartema mutindu na mutindu, mpe kisalu ya bau kesimbaka kisalu ya kusamuna na buala mosi to mingi. Balenda sala na baekipi ya kubangula mikanda, kubimisa bazulunalo na masini, kukubika mikanda, kutinda mikanda na bisika yankaka, kubimisa ba CD to bavideo, to kusala mambu yankaka.

Komite ya filiale ketuadisaka kisalu. Kimvuka ya Ntuadisi ketulaka Komite ya filiale yina kele na bankulutu tatu to kuluta, yina mefuana mpenza, samu batuadisa biro ya filiale. Bampangi yango kezabisaka Kimvuka ya Ntuadisi mutindu mambu kena kutambudila mpe mambu ya mpasi nionso yina kebimaka na buala yina bau kena kutuadisila kisalu. Yau kesadisaka Kimvuka ya Ntuadisi bapona mambu yina bau ketubila na mikanda yina kebima mpe na balukutakanu ya kimvuka mpe na balukutakanu ya nene. Mbala na mbala, Kimvuka ya Ntuadisi ketindaka bamonisi na yau samu na kutala babiro ya filiale mpe kupesa bampangi ya bakomite ya filiale malako samu na kukokisa biyekua na bau. (Bingana 11:14) Na lukutakanu mosi ya nene, monisi yango kepesaka diskur samu na kukindisa bampangi ya yinsi yina.

Yau kesadisaka bimvuka ya yinsi yango. Bampangi ya babakala yankaka na biro ya filiale kele na kiyekua ya kundima ti bimvuka ya yimpa zibuka mpe bau ketadilaka kuponama ya bankulutu na bisadi na kisalu. Yakele diaka na bampangi yina ketadilaka kisalu ya bampasudi-nzila, ya bamisionere, ya bankengidi ya kizungidila yina kena sala na terituare ya filiale yango. Bakekubikaka balukutakanu ya fioti mpe ya nene, baketuadisaka bisalu ya kutunga Bayinzo ya Kimfumu ya yimpa, mpe bau kesalaka nionso samu mikanda kumina bimvuka na kulanda bansatu na bau. Nionso yina kesalamaka na biro ya filiale kele samu kisalu ya kusamuna salama na kudedama.​—1 Bakorinto 14:33, 40.

• Yinki mutindu Komite ya filiale kesadisaka Kimvuka ya Ntuadisi?

• Yinki mambu kesalamaka na biro ya filiale?