Esi Betele salu ya mpila mu mpila besalanga muna lunga-lunga salu kia samuna nsangu zambote mu nsi mosi yovo nsi zayingi. Akaka besalanga salu kia sekola nkanda, nieteka nkanda, vanga mabuku m’Eyingidilu, sadila muna suku dia lundila e nkanda, audio/video ye salu yakaka ivwangwa o mfunu muna zunga.

E Buka kia Afidi a Betele yau befilanga e salu. Selo Yambuta beyekekanga e mbebe ya fila betele yovo mavula kwa Afidi a Mavula, tezo kia akuluntu tatu azikuka yovo vioka befilanga mavula mama. Afidi a mavula, bezayisanga nsangu za lunungunuku lwa salu kia nsi au kwa Buka kia Selo Yambuta ye konso diambu dibwanga. E nsangu zazi zisadisanga Selo Yambuta mu zaya kana nkia mambu bekotesa muna nkanda bevaikisa, muna malongi melongokwa muna nkutakani ye muna tukutakanu twampwena. Vena ye mpangi befilwangwa kwa Selo Yambuta mu kingula mavula. Mpangi zazi befilwanga nkumbu mosi muna mvu mu kingula mavula yo sadisa Afidi a Mavula kimana balungisa e salu kiau una ufwene. (Ngana 11:14) O nsunzudi a vula dia sina ofilanga elongi dia lukasakeso kwa nkangu bezingilanga muna zunga kia vula kekingula.

Betele zisadisanga nkutakani. Ampangi befilanga mavula bevananga o nswa wa ziula e nkutakani zampa. Kuna mpe ye mpangi befilanga e salu kia aviti a nzila, misionario ye akengi a zunga besadilanga muna zunga kia nsi au. Bevanganga e nkubika za tukutakanu twa zunga twa lumbu kimosi, twa mvivu ye salu kia tunga Maseka ma Kintinu. Bevanganga mawonso mu twika e nkanda muna nkutakani. Salu yawonso isalwanga kuna Betele isadisanga muna lungisa e salu kia samuna e nsangu zambote una ufwene.​—1 Korinto 14:​33, 40.

• Aweyi Afidi a Betele besadisilanga Selo Yambuta?

• Nkia salu isalwanga kuna Betele ya Mbangi za Yave?