Bamukwashi wa Betelo balasebensa mumadipatimenti apusenepusene, atanjilila ncito yakushimikila mucishi comwi na kwiindaawo. Balasebensela mutubunga twabeshikusansulula, kupulinta mamagazini amabuku, kuyoobolola mabuku, kupanga mavidyo aamba shamakani amuBaibo alimwi akulekoda, na incito shimwi shiyandika kumusena uko.

Komiti ya Musampi ilatanjilila ncito shapa Betelo. Likoto Litanjilila lyakapa Komiti Yamusampi incito yakutanjilila maofesi amusampi, mukomiti iyi mulaba bamanene bashikiteewo botatwe na kwiindaawo. Komiti ya Musampi ilashibisha bamu Likoto Litanjilila sha ncito mboyitokweenda mucishi mobasebensela alimwi amapensho ali oonse aliiko. Ici cilacafwa Likoto Litanjilila kushiba nsheenga balemba mumabuku eshi akalembwe kunembo, alimwi amakani akwiiya pamabungano ansondo ansondo alimwi amabungano anene. Beshikwiimikaninako Likoto Litanjilila, ciindi aciindi balafwakashila maofesi a musampi akucafwa bamuKomiti ya Musampi mbweenga basebensa ncito yabo. (Tushimpi 11:14) Shikwiimikanina likoto Litanjilila na wafwakashila musampi, kulaba kubungana kulibetele, pakubungana uku, shikwiimikanina maofesi anene ulaamba likani lyakuyuminisha bamucishi ico abamushishi shimwi batanjililwa aofesi yamusampi.

Kucafwilisha Mabungano. Pamusampi pali bamakwesu bakapekwa ncito yakusuminisha ayi mabungano apya apangwe. Bamakwesu aba mbobabona pancito ya bapainiya, bamishonali, abamatanjilili balubasu basebensela mumusena utanjililwa amusampi. Mbobabamba mabungano anene akutanjilila ncito yakuyaka Maanda a Bwaami apya, alimwi akushinisha kwaamba ayi mabungano oonse atambula magazini alimwi amabuku amwi ayandika. Incito shoonse shicitwa paBetelo, shilalengesha ayi incito yakushimikila inokweenda kabotu.—1 Bene Kolinto 14:33, 40.

• Ino bamu Komiti ya Musampi balacafwa buyani Likoto Litanjilila?

• Ino kuofesi yamusampi kulacitwa ncito nshi?