Yo in kjuarmajme kʼo pɇpji a Betel kjaji na punkjꞹ bʼɇpji, ka̱ra̱ kjuarma kʼo opjꞹ skuama kja o idioma kʼꞹ ñaji kja o país, ka̱ra̱ kʼo kamaji xiskuama, ka̱ra̱ kʼo nuu janzi xiskuama nesta ke ra tsjaji ñe janzi ra mbenpeji yo congregación, ka̱ra̱ kʼo kjaji disco ngekʼua ra ⱥrⱥji kʼo mama yo skuama xo kjaji película ngekʼua ra janrraji. Nge yo na kjaji kja yo sucursal, nzi na sucursal pjøsʼꞹji naja o na punkjꞹ país. Ga kjaba pjøsʼꞹji yo ntee ra pjechiji pje mama ne Biblia.

Kja yo sucursal yo testigo e Jehová bʼꞹbʼꞹ kjuarma kʼꞹ otrʼꞹji axojñi. Kʼe Cuerpo Gobernante juajnꞹ jñii o más de jñii bʼɇzo kʼꞹ ra otrʼꞹji axojñi kja yo sucursal. Nujyo kjuarma xipjiji kʼe Cuerpo Gobernante kʼo kjaji kja yo sucursal nu ja pɇpjiji xo xipjiji yo nrrumꞹ ke pɇsʼiji. Akjanu, kʼe Cuerpo Gobernante ra mba̱ra̱ pje ma tema søø ra dyopjꞹji kja yo skuama kʼo ra xørꞹjme ma ra jmurꞹjme kja congregación ñe yo discurso kʼo ri ⱥrgojme kja yo asamblea. Kʼe Cuerpo Gobernante pejñe kjuarma kʼꞹ ra ma ngijñiji yo sucursal ngekʼua ra nuji ja ga pɇpjiji. Nujyo jichiji kʼo kjuarma kʼꞹ otrʼꞹji axojñi kja yo sucursal ja rga tsjaji o bʼɇpji (Proverbios 11:14). Yo paa ma yo kjuarma ra ma ngijñiji yo sucursal kjaji na reunión, dʼa kjuarma unꞹ na discurso, texe yo kjuarma ñe yo kju̱ʼu̱ kʼꞹ ka̱ra̱ji kja o territorio nu sucursal søø ra dyⱥrⱥji ne discurso zo na je̱e̱ ja bʼꞹnji.

Yo sucursal pjøsʼꞹ yo congregación. Kja yo sucursal manji ma ra mbedye na dʼadyo congregación. Xo manji ja rga pɇpjiji yo precursor, yo misionero ñe yo superintendente kʼo pa zenguaji yo congregación. Kja yo sucursal nuji ja nge nu ra tsjaji yo asamblea. Xo nuji kʼo ra tsjaji ma ra jyⱥnji ngumꞹ ja ni jmurꞹji ñe pejñeji skuama kja yo congregación. Nrrexe kʼo kjaji a Betel pjøxkꞹjme ngekʼua ra sⱥtrʼⱥjme kja na punkjꞹ jñiñi ra jichijme yo ntee o Jñaa e Mizhokjimi (1 Corintios 14:33, 40).

• ¿Pje kjaji yo kjuarma yo otrʼꞹ axojñi kja yo sucursal ngekʼua ra mbøsʼꞹ kʼe Cuerpo Gobernante?

• ¿Pje ma bʼɇpji kjaji kja yo sucursal?