Vamuanetu va kala ha Mbetele ve ku pangela ku vi seketa via ku liseza-seza. Vamo ve ku endesa cipanga ca kuambulula mu cifuti cimo ni via vingi. Vakuavo va pangela ku vivunga via ku langulula mu malimi, ku ku tuhula mikanda, ku ku panga mavulu, ku vutulikilo vua mikanda, ku tuhula vivideo, avaco ve ku tala via vimpande ku cihela caco.

Civunga ca Vakuluntu va Mbetele ce ku endesa vipanga. Civunga ca Vantuamena ca Vakaleho va Yehova ce ku hangula vakuluntu va ku hia mu sipilitu va ku pua vatatu ni va ku tuvakana oho linga va pue vantuamena. Vakua Civunga ca Vakuluntu va Mbetele ve ku tuma ku Civunga ca Vantuamena mizimbu ya ku tuikilila ca vipanga na vukalu vu li na ku soloka mu cihela ci va va hanguila ku niunga. Mizimbu yaco ye ku kuasa vakua Civunga ca Vantuamena ku hangula vimpande vika va na pande ku soneka mu mikanda i va ka tuhula ku lutue, ku ku likungulula na ku viuano via kama vi keza ku lutue. Cikuavo naua, Vakua ku Imanena Civunga ca Vantuamena ce ve ku va tuma mu ku meneka viMbetele na ku kuasa Civunga ca Vakuluntu va Mbetele mu visoti vi ve ku uana mu vipanga viavo. (Visimo 11:14) Kue ku kala ku kunguluka cimo ca ku lifuila muomu Mukua ku Imanena Civunga ca Vakuluntu va Mbetele ue ku hana cimpande cimo ca seho mu ku kolesa vaze va tunga mu cifuti ci va na mu tumu.

Ve ku hana vukuasi ku vikungulukilo. Vamo vandolome va ha Mbetele va kala na mpoko ya ku tavesa ku sokolola vikungulukilo via viha na ku hangula vakuluntu va mu cikungulukilo na vakua ku kuasa vipanga. Vamuanetu vamo ve ku endesa vipanga via vapioneiro, vamisionaliu, na tuniungi va ku zinguluka vaze ve ku pangela mu cifuti cavo. Ve ku viukisa naua viuano via kama na ku endesa cipanga ca ku tunga Vindzivo via Vuangana na ku tala nga mikanda ili na ku heta mua cili ku vikungulukilo linga va kolese vamuanaye mu lutsilielo. Viose vi ve ku panga ku Mbetele via pua lika via ku puisamo cipanga ca kuambulula.​—1 Kolintu 14:33, 40.

• Vati Civunga ca Vakuluntu va Mbetele ve ku kuasa Civunga ca Vantuamena?

• Viteli vika ve ku tala vakua seketa ya Mbetele?