Ndhengo jo mbhuri yo Bheteri jinoshandira mu mabauhwa akasiana-siana, jecibesera basa ro kucumaera mu nyika imwe kana mu nyika zinji. Ivona vangashanda mu cikwata co vasanduji, kudhindha magazini, kurongeja mabhuku, munovigwa mabhuku, kubudiswa ko madhisko/mavhidhio kana zvimweni zvo mu mutundhu wo munyikeyo.

Cikwata co cine cinovonerera basa. Mukhumbi Unotonga wakathemba kushanda ko hofisi yo cine ku Cikwata co Cine cakaumbhwa ngo vakuru va tatu kana kupinda vakakwaniriswa. Cikwata co cine cinozivisa Mukhumbi Unotonga kuenderera mberi ko basa zve no ndhango jingaitika mu nyika imwe nga imwe inovonerehwa ngo cikwateco. Ripoti iji jinobesa Mukhumbi Unotonga kuti usunge shwiro inoda kuzonangwa pa mabhuku, zve pa musongano no magungano. Vaimiriri vo Mukhumbi Unotonga vanotumwa nguva jese kuti vabvakacire macine zve vanopa ndhungamiro ku Cikwata co Macine. (Mazwi Akangwara 11:14) Urongwa hunosisira kubatanija hurukuro inoizwa ngo muimiriri wo cine ro pasi pese, uno nasirihwa kuitira kuvangisa vanorarama mu ndima yo cine ro mu nyikemo.

Ungano jo mu mutundhumo jinopuwa besero. Hama jino mutoro pa hofisi yo cine jinodavira kuumbhwa ko ungano impsa. Hama jino tungamirirazve basa ro ma piona, ma misionario no vavonereri vo ndharaunda vanoshandira mu ndharaundha yo cinero. Ivona vanonasirira magungano vanoronga kuvakwa ko Nyumba jo Umambo impsa zve vanovonerera kuendeswa ko mabhuku kuitira zvinodiwa zvo ungano. Zvese zvinoithwa pa cine zvinobesera kuti basa ro kucumaera rifambe zvakanaka.—1 VaKorinto 14:33, 40.

• Cikwata co Cine cinobeseresa kudini Mukhumbi Unotonga?

• Ngo wapi mutoro wo Cikwata co cine?