Aantu mboka haya kala megumbo lyaBetel ohaya longo miikondo yi ili noyi ili, taya sile oshimpwiyu iilonga yokuuvitha yomoshilongo shimwe nenge yomiilongo oyindji. Otashi vulika ya kale aatoloki, haya nyanyangidha iifo, haya ningi omambo, haya tula iileshomwa mompungulilo yayo, haya kwata omawi nenge haya ningi uuvidio, nenge haya ningi iinima yilwe mbyoka yi na okuningwa koshitayimbelewa shawo.

Okomitiye yOshitayimbelewa oyo hayi tonatele iilonga. Moshitayimbelewa kehe omu na okomitiye ya langekwa po kOlutuwiliki yi shi tonatele, nokomitiye ndjoka ohayi kala ya thikama po maakuluntugongalo ya pyokoka pambepo yatatu nenge ye vulithe po. Okomitiye ohayi tseyithile Olutuwiliki shi na ko nasha nehumokomeho lyiilonga yomoshilongo kehe shoka shi li kohi yetonatelo lyayo nosho wo shi na ko nasha nuupyakadhi mboka tashi vulika wa holoka po. Oolopota ndhoka ohadhi kwathele Olutuwiliki lu mone kutya oshike shi na okukundathanwa miileshomwa yomonakuyiwa, pokugongala nosho wo piigongi. Aatonateli yiitayimbelewa ohaya tumwa kolutuwiliki ya ka talele po iitayimbelewa nokugandja ewiliko kOkomitiye yOshitayimbelewa yi vule okugwanitha po iinakugwanithwa yawo. (Omayeletumbulo 11:14) Sho omutonateli gwoshitayimbelewa te shi talele po ohapu ningwa okugongala kwi ikalekelwa mpoka ha gandja oshipopiwa nelalakano lyokuladhipika mboka ye li momagongalo ge li kohi yoshitayimbelewa shoka.

Oshitayimbelewa ohashi ambidhidha omagongalo. Aalumentu mboka taya kwatele komeho iilonga moshitayimbelewa oyo haya gandja epitikilo opo ku totwe omagongalo omape yo oyo wo haya ungaunga nelangekopo lyaakuluntugongalo naayakuligongalo. Aalumentu mbaka ohaya wilike wo iilonga yaakokolindjila, yaatumwa, nosho wo yaatonateli aayendi mboka taya longo miitopolwa mbyoka yi li kohi yoshitayimbelewa. Ohaya unganeke iigongi iishona niinene, okutungwa kwIinyanga yUukwaniilwa iipe, nokushilipaleka kutya iileshomwa oya tuminwa komagongalo shi ikolelela kwaashoka ga pumbwa. Kehe shimwe shoka hashi longwa moshitayimbelewa ohashi ambidhidha iilonga yokuuvitha opo yi longwe palandulathano. — 1 Aakorinto 14:33, 40.

• Ookomitiye dhIitayimbelewa ohadhi ambidhidha ngiini Olutuwiliki?

• Iilonga yini hayi longwa koshitayimbelewa?