Ayata ti nda sewa ti Bɛtɛlɛ ndo li kwa ka adepartɛma ndɛ ndɛ ndɛ, ti bangɔ kwa ti fangɔ tɛnɛ ka ya kɔi ti akɔdɔrɔ ndɛ ndɛ ndɛ. Ala lengbi ti lingɔ kwa ka ndo ti gbinyangbingɔ na ayanga, singɔ na azuluna, gbelengɔ abuku, ka da ti bombingɔ na ambeti, da ti mungɔ na legɔ̃ bere avideyo, bere lingɔ akwa mɛ ndɛ.

Kɔmite ti filialɛ ndo ba kwa ti fangɔ tɛnɛ. Bombi tɛ Adonzi ndo kpã Kɔmite ti filialɛ mɛ na abiazi taa bere a ɔ, mɛ alengbi ti bangɔ ndó kwa ti biro ti filialɛ. Ayata ti kɔmite ndo pa hɛ na Bombi tɛ Adonzi semɛ kwa ndo dɔ na nɔ̃ nga na akpengba lo mɛ ndo si ka ya kɔdɔrɔ tɛ la. Lapɔlɔ ko ala ndo to ndo za Bombi tɛ Adonzi ti bangɔ ye mɛ alengbi ti singɔ ka ya ambeti mɛ na singɔ bere ye mɛ e na mangɔ ka bombi bere ka kota bombi tɛ e. Bombi tɛ Adonzi ndo to azi tɛ lo ya buru kɔi kɔi ti bangɔ abiro ti filialɛ nga ti hɛngɔ ayata ti Kɔmite ti filialɛ awangɔ mɛ aza la ya ala li kwa tɛ la na seni. (Masese 11:14) Nyita ko Bombi tɛ Adonzi to lo ndo li adiskur ti kpengbangɔ na bɛ ayata ko filialɛ ndo ba ndó la.

Ndo ba nga kwa tɛ abombi. Ayata kɔli mɛ ndɛ mɛ ndo li kwa ka biro ti filialɛ ndo zi lége ya asi na abombi ti fanani. Ayata kɔli mɛ ndɛ ndo ba akwa tɛ awa sungɔ lége, amisiɔnɛrɛ, nga na awa bangɔ ndó kɛlɛ kɛlɛ mɛ ndo li kwa ka ya kɔdɔrɔ mɛ filialɛ ndo ba. Ala ndo lɛkɛ akota bombi ti bi kɔi bere ti bi gba, ndo ba kwa ti kĩngɔ ada Lo-lengɔ Gbia ti fanani, ala ndo li kpengbani ya ambeti asi ka tɛ ayata ti abombi. Ye zu mɛ ndo li ka biro ti filialɛ ndo du bo ya kwa ti fangɔ tɛnɛ a ɔ na seni.​—1 Kɔrinto 14:33, 40, NW.

• Kɔmite ti filialɛ ndo za Bombi tɛ Adonzi ngasia?

• Akwa mɛ ndo ɔ ka biro ti filialɛ nɛ?