Yej cha̱ntitokej pan Betel kichi̱waj miak tekipano̱lis iga kipale̱wiáj tajto̱lmoya̱walis de se̱ o miak pai̱smej: sekin kichi̱waj iga a̱matajkuilo̱lmej maki̱sa pan seuʼ tajto̱l, seuʼmej kiki̱xtiáj pan a̱maʼ, wan seuʼmej kichi̱waj iga maki̱sa ken se̱ folleto o libro, wan sekin kinechkowaj a̱matajkuilo̱lmej wan seuʼmej kichi̱waj iga maki̱sa pan audio wan video, wan seuʼmej kichi̱waj seuʼ tekipano̱lis.

Onoʼ se̱ Comité yej Tayaka̱na pan la Sucursal wan iní̱n kitaj te̱ mamochi̱wa. Comité yej Kiojkuiltiáj yej Tajto̱lmoya̱waj de Jehová kita̱liá se̱ comité yej matayaka̱na pan cada sucursal, pan iní̱n comité onokej e̱yi o ma̱j tayaka̱naj. Ini̱nmej kijliáj te̱ nemi mochi̱wa pan iterritorio wan te kiyo̱lmiktiáj, iní̱n kichi̱wa iga Comité yej Teojkuiltiá makimatikan de te̱ yawij tajto̱tij pan a̱matajkuilo̱lmej, pan tanechko̱lismej wan pan weyi tanechko̱lismej. Cada xiwiʼ Comité yej Kiojkuiltiáj yej Tajto̱lmoya̱waj de Jehová kiti̱tanij (o gojmagaj) sekin tokni̱wan iga makine̱xtili̱kan yej Tayaka̱naj pan sucursales te̱ welij kipale̱wiáj iga makichi̱wakan ma̱j ye̱kti itekipano̱lismej (Proverbios 11:14). Kua̱ ini̱nmej tokni̱wan kipaxa̱lowiliáj la sucursal, mochi̱wa se̱ tanechko̱lis, wan toknin yej tapaxa̱lowiliá kipano̱ltiá se̱ discurso yej kiyo̱lketsa nochi tokni̱wan yej onokej pan iterritorio la sucursal.

Kipale̱wiáj tanechkolismej. Pan la sucursal moita siga welij mochi̱wa yankuiʼ tanechko̱lismej (o congregaciones). Wan no̱ ompa kijliáj kén matekipano̱kan los precursores, misioneros wan tayaka̱naj de circuito yej onokej pan iterritorio la sucursal. Kitaj kén yawi mochi̱wati weyi tanechko̱lismej, kén yawi mochi̱wati Kajli kan Monechkowaj yej Tajto̱lmoya̱waj de Jehová wan kiti̱tanij (o gojmagaj) a̱matajkuilo̱lmej iga tanechko̱lismej. Nochi yej mochi̱wa pan se̱ sucursal te̱pale̱wiá iga matitajto̱lmoya̱wakan ye̱kti (1 Corintios 14:33, 40).

• Yej Tayaka̱naj pan Sucursales, ¿kén kipale̱wiáj el Comité yej Kiojkuiltiáj yej Tajto̱lmoya̱waj de Jehová?

• ¿Te̱ mochi̱wa pan se̱ sucursal?