Ababeseeli nibakora emirimo etari emwe erikushagika omurimo gw’okubuurira omu ihanga rimwe nari maingi. Bamwe nibabaasa kuheereza nk’abavunuuzi, abandi omu kuteera ebitabo na zaamagaziini, kandi abandi omu kukora zaavidiyo nari emirimo endiijo.

Akakiiko k’Eitaagi nikareeberera emirimo y’obuheereza. Akakiiko k’Eitaagi akarikuba kariho abareeberezi bashatu nari n’okukiraho nikaheebwa ab’Akakiiko Akareeberezi obujunaanizibwa bw’okureeberera emirimo y’obuheereza ey’omu ihanga ryabo. Ab’akakiiko ako nibaguma nibamanyisa ab’Akakiiko Akareeberezi oku omurimo gw’okubuurira omu ihanga eri barimu gurikugyenda. Ebi ab’Akakiiko Akareeberezi barikumanyisibwa nibibahwera kucwamu ebi baraije kuhandiika omu bitabo ebiraateerwe, ebi turaayegeho omu nteerane z’ekibiina n’enteerane empango. Abarikujwekyera Akakiiko Akareeberezi nibakira kwoherezibwa kutaayaayira ofiisi z’amataagi kandi baha obuhabuzi abari aha Bukiiko bw’Amataagi aha ku baine kuhikiiriza gye obujunaanizibwa bwabo. (Enfumu 11:14) Nihabaho oruteerane rw’omutaano, reero orikuba ajwekiire Akakiiko Akareeberezi naaha orubazo kugumya ab’eishe-emwe ab’omu ihanga eri ataayaayiremu.

Akakiiko k’eitaagi nikahwera ebibiina. Ab’akakiiko k’eitaagi nibo barikwikiriza ebibiina bisya kutandika. Ab’eishe-emwe abo nibareeberera omurimo gwa baapayoniya, abamiisani n’abareeberezi abarikutaayaayira ebibiina abari omu kicweka kyabo. Nibatebeekanisa enteerane empango ez’ebiro bibiri nari bishatu, bareeberera omurimo gw’okwombeka Ebyombeko by’Obukama ebisya kandi bahamya ngu ebitabo byayoherezibwa omu bibiina. Byona ebirikukorwa aha ofiisi y’eitaagi nibihwera omurimo gw’okubuurira kugyenda gye omu maisho.—1 Abakorinso 14:33, 40.

• Obukiiko bw’Amataagi nibuhwera buta Akakiiko Akareeberezi?

• Ofiisi y’eitaagi eine bujunaanizibwa ki?