Betel ailluga caran llacta oficinagunai Diospa Shimira runaunama pactachingahua tarbanun. Shuj shimi rimanaunai pasachisha, Bibliamanda quillcaunara copiasha, muntunasha, shinallara Diospa Shimimanda uyana videogunara llucchisha, ima ministirishcaunais tarbasha yanapanun.

Oficinara mingashca huauquiunaga ali tarbanuchu yanapanun. Jehovahuaj Testigogunara Cuiraj Muntun, huaquin huauquiunara saquinushcami oficinagunara ali ricunuchu. Cai huauquiunaga Jehovahuaj Testigogunara Cuiraj Muntunma cuintanun, chi llactai imasna Jehovahuaj testigoguna mas yaparishcara. Shinallara paiguna llactai ima problemaguna tiangaraujta cuintanun. Shina rajpimi shamuj revistagunai, librogunai, tandarinaunai, asambleagunais ima ministirishcara yachachinunga. Jehovahuaj Testigogunara Cuiraj Muntunga paiguna shutii shu huauquira cachanmi oficinara mingashca huauquiunara yanapangahua (Proverbios 11:14). Cai huauqui Estados Unidos llactai tiaj Betelmanda shamushcai shu gustu Bibliamanda yachachisha uyachinara uyangahua tandarinun. Chita uyasha, chi llactai sirvijcuna paiguna quirinara shinzhiyachinun.

Tandarijcunara yanapanun. Oficinagunai ima partii mushuj tandarijcuna tiachun ninun. Astaumbas precursorgunara, misionerogunara, Cuirasha Purij huauquiunaras ali tarbanuchu yanapanun. Shinallara asambleaguna ali llucshichu yanapanun, tandarina huasiunaras ali tarbanuchu ricuchinun Bibliamanda quillcaunara tucui tandarijcunama cachanun. Oficinaibi tucui tarbashcaunaga yanapanmi Diospa Shimira tucuigunara yachachingahua (1 Corintios 14:​33, 40).

• Oficinara mingashca huauquiunaga ¿imasnara Jehovahuaj Testigogunara Cuiraj Muntun yanapanun?

• Oficinaibiga ¿ima ruranallaira tarbanun?