O beteliťi keren buťi andre pobočka, so pes starinel pal e zvestovaťeľsko buťi andre jekh abo buter krajini. Prethoven e literatura andre aver čhiba, tlačinen o časopisi abo kňižki, bičhaven len andro zbori, keren audio, videonahravki, abo keren, so kampel.

Hin ode pobočkakero viboris. O phrala, so ľidžan amari organizacija kiden avri andre dojekh pobočka 3 abo buter skusene staršen, so pes starinena pal e buťi andre pobočka. Ala starši lenge den spravi pal o pokroki andre krajina či krajini, pal save pes starinel lengeri pobočka a save pharipena ode o phrala zadživen. Ala spravi pomožinen te kidel avri o temi, so ena andre literatura, pro zhromažďeňa the pro zjazdi. O zastupci le phralendar, so ľidžan amari organizacija, hine bičhade andro beteli, anen o pokini, kaj pobočkakero viboris te kerel feder peskeri buťi. (Príslovia 11:14) Le zastupcas hin prekal amende zvlaštno programos la prednaškaha, kaj te posilňinel savoren, so patrinen tel e pobočka.

Pomožinel le zborenge, pal save pes starinel. O zodpovedna phrala andre pobočka schvaľinen neve zbori. Dodikhen pre buťi, so keren o prjekopňika, misijonara, krajska služobňika. Organizinen o zjazdi. Dodikhen, kaj pes te budinen o khera, andre save amen hin o zhromažďeňa. Pomožinen, kaj te el andro zbori e literatura, savi kampel. Ada, so pes kerel andre pobočka, pomožinel te kerel e zvestovaťeľsko buťi so nekfeder. (1. Korinťanom 14:33, 40)

• Sar o vibori andro pobočki pomožinen le phralenge, so ľidžan amari organizacija?

• Pal soste pes e pobočka starinel?