LEHONA 22
He ā nā Mea e Fai i te Ofiha o te Lālā?
E kehekehe nā matāgaluega e galulue ai nā tino o te kāiga o Peteli, e taukikila te galuega tālaki i te tahi pe tokalahi o nā fenua. E mafai oi kaukauna atu ki latou i ni kau fakaliliu, lōmia o ni mekahini, tuku fakatahi o ni tuhi, galulue i te faletuhi lahi, fai puke leo/vitiō, pe fai ni iē tahi mea mo te kogāfenua.
E taukikila e he Komiti o te Lālā te galuega. E tuku atu e te Vaega Pule te pulea o nā ofiha o nā lālā takitahi ki he Komiti o te Lālā e toka tolu pe hili atu o ni toeaina e auhia lelei. E fakailoa atu e te komiti o te Vaega Pule nā fakamatalaga e uiga ki te tupu ake o te galuega i nā fenua uma e i lalo o te pulega a te komiti ma hō he fakafitauli atonu e tupu. Ko nā lipoti iēnei e fehoahoani ki te Vaega Pule ke fai ni fakaikuga ki nā matakupu e fakatatau ki nā lōmiga, i hauniga, ma nā fonotaga i te lumanaki. Ko nā hui o te Vaega Pule e takua ko ni tino tauhi hone e uga atu ke ahiahi pea ki nā lālā ma fōki atu ni takiala ki nā Komiti o nā Lālā ke fai o latou tofiga. (Fataoto 11:14) E fakamaopoopo he polokalame fakapito e aofia ai he lauga e fai e te tino tauhi hone ke fakalotomalohi ki latou e nonofo i loto o te kogāfenua o te lālā.
E kavatu te lagolago ki nā fakapotopotoga e pili mai. Ko nā uho e i ei nā tiute taukave i te ofiha o te lālā e talia te kamata o ni fakapotopotoga fou ma talia te tofia o nā toeaina ma kaukauna fehoahoani. E fakatonu foki e nā uho te galuega a nā paeonia, nā mihionale, ma nā tauhi malaga e kaukauna i loto o te kogāmea o te lālā. E fakamaopoopo e ki latou nā fonotaga, galue fakatahi ke fau nā Fale o Hauniga, ma taukikila te lafo atu o nā lōmiga ki nā fakapotopotoga ke kavatu nā mea e mananako ki latou ki ei. Ko nā mea uma e fai i he lālā e fehoahoani atu ki te fakahologa lelei ma te fakataunuku o te galuega tālaki.—1 Kolinito 14:33, 40.
-
E fehoahoani vēhea nā Komiti o Lālā ki te Vaega Pule?
-
He ā nā tiute taukave a te ofiha o te lālā?