Lavanga betele va tirha ka madepartamentu ya ku hambanahambana lomu va vonelelaka ntirho wa kuchumayela wa tiko lin’we kumbe kutlula. Vangaha yaviwa kutirha ka ntlawa wa kuhundzuluxela, ka ku imprimira mabuku, ka kukadernara mabuku, ka kuhlayisa mabuku, ka kuyendla mavhidiyo ni swa kuyingisela kumbe ka kuvonelela swilo swin’wana atikweni.

A Comissão ya Filiyali yi vonelela mintirho ya ku hambanahambana. Ka Betele lin’wana ni lin’wana, a Ntlawa Lowu Rhangelaka wu lange Comissão ya Filiyali leyi vumbiwaka hi madoda manharhu kumbe kutlula lama wupfeke. A comissão leyi hi yona yi tivisaka Ntlawa Lowu Rhangelaka hi nhluvuku lowu yendlekaka tikweni ka ntirho wa kuchumayela ni swikarhatu hinkwaswu leswingaha humelelaka. Marungula wolawo ma pfuna Ntlawa Lowu Rhangelaka kuyendla xiboho xa leswinga djondziwaka nkameni lowu taka ka mabuku, ka mintlhanganu ni ka masembleya. Vanyimeli va Ntlawa Lowu Rhangelaka va rhumeliwa nkama wun’wana ni wun’wana swaku vaya pfuxela mabetele va tlhela va nyika Comissão ya Filiyali swileleto leswingatava pfuna kuyendla kahle mintirho ya vona. (Swivuriso 11:14) Kulunghiseleliwa ntlhanganu wa kuhlawuleka ni wukaneli leli vekiwaka hi munyimeli wa ntsindzankulu swaku a tiyisa hinkwavu lavanga ka teritoriyu la Betele lolelo.

Kupfuniwa mabandla ya kola tikweni. Vamakwerhu lavanga ni wutihlamuleli aBetele va pfumelela swaku kuvumbiwa mabandla ya nyuwani, va tlhela va vonelela mintirho leyi yendliwaka hi vapfuli va ndlela, vamisiyonariyu ni vadjikelezi lava tirhaka ka teritoriyu la Betele lolelo. Naswona va lunghiselela masembleya, makongresu, va kongomisa ntirho wa kuyaka Tiyindlo ta Mfumu ta Timboni ta Yehovha ni kutlhela va vonelela mhaka ya kuposa mabuku ka mabandla. Hinkwayu mintirho leyi yendliwaka Betele yi pfunisa swaku ntirho wa kuchumayela wu yendliwa hi ndlela leyi hlelekeke. — 1 Vakorinto 14:33, 40.

• A Comissão ya Filiyali yiwu pfunisa kuyini Ntlawa Lowu Rhangelaka?

• Hi yihi mintirho leyi yendliwaka Betele?