Вефил өг-бүлезиниң кежигүннери янзы-бүрү килдистерде бараалгап, суртаал ажылын чаңгыс азы каш чурттарда деткип турар. Олар дептерлер очулдуруп, сеткүүлдер парлап, номнар карттап, дептерлер складынга ажылдап, аудио болгаш видео үндүрүп, өске-даа чугула ажылдарны кылып турар.

Салбыр комитединиң хайгааралының адаанда. Удуртукчу чөвүлел салбырны башкарарын үш азы оон-даа хөй дуржулгалыг удуртукчулардан тургустунган салбыр комитединге дагзып каан. Комитет Удуртукчу чөвүлелге салбырның харыылап турар чурттарында суртаал ажылы канчаар чоруттунуп турарын база тургустунуп кээр янзы-бүрү бергелерниң дугайында дамчыдып турар. Ол чүүл Удуртукчу чөвүлелге дептерлерге, хуралдарга болгаш шуулганнарга кандыг темаларны сайгарарын шиитпирлээринге дузалап турар. Удуртукчу чөвүлел салбырларже бодунуң төлээлекчилерин үргүлчү чоргузуп турар. Ол акыларывыс салбырларны кезип, комитет кежигүннеринге даалгазын күүседиринге дузалаар удуртулганы берип турар (Чугаалар 11:14). Салбырның харыылап турар девискээринде чурттап турар улуска тускай ужуражылга көрдүнген. Аңаа кол башкарылга чериниң төлээлекчизи илеткел чугаалаар.

Тус черниң хуралдарының дугайында сагыш човаары. Салбырда харыысалгалыг акылар чаа хуралдарны тургузарынга хамаарыштыр шиитпирлерни хүлээп турар. Оон аңгыда олар салбырның харыылаар девискээринде бараалгап турар эгелекчилерниң, миссионерлерниң база кожуун хайгааракчыларының ажыл-херээн удуртуп турар. Олар шуулганнарны белеткеп, Хурал залдарын тударын аайлап-баштап, хуралдарже дептерлерни чорударын хайгаарап турар. Салбырның шупту ажыл-херээ суртаал ажылы демниг болгаш корум-чурумнуг кылдыр чоруттунарынче угланган (1 Коринфичилерге 14:33, 40).

• Салбырларның комитеттери Удуртукчу чөвүлел-биле канчаар ажылдажып турарыл?

• Салбырлар чүнү харыылап турарыл?