Baphangi zi Betele beta vana mioko mu zidepartema zi phila mu phila, ayi kisalu kieta tadila kisalu ki samuna mu tsi mosi, voti mu zitsi ziwombo. Balenda sala mu ziekipi zi bangula minkanda, zi bimisa zizulunalu mu masini, zi yika minkanda, mu zinzo zi lundila minkanda, bimisa zi-CD voti zivideo, voti bisalu binkaka.

Komite yi filiale yeta tuadisa kisalu. Kimvuka kintuadisi kieta tula Komite yi filiale yo yidi bakulutu batatu voti viokila bo bafueni mu diambu batuadisa Biro yi filiale. Baphangi beni beta kamba Kimvuka kintuadisi phila yo mambu malembo diatila ayi mambu moso ma phasi momo meta bima mu tsi yoyi balembo tuadisa kisalu. Yawu yeta sadisa Kimvuka kintuadisi basobula mambu momo bafueti tubila mu minkanda mio miela bima, ayi mu zikhutukunu zi bimvuka ayi mu zikhutukunu zinene. Kadika khumbu, Kimvuka kintuadisi kieta tinda m’monisi awu muingi mu tala zibiro zi filiale ayi vana baphangi zi Komite yi filiale malongi mu diambu di dedikisa biyeko biawu. (Zingana 11:14) M’monisi beni weta vana diskure mu lukutukunu mosi lunene mu diambu di kindisa baphangi zi tsi yina.

Komite yi filiale yeta sadisa bimvuka bio bidi mu tsi beni. Baphangi ba bakala bankaka ba biro yi filiale badi kiyeko ki kikinina ti kimvuka kimona kizibuka. Baphangi bankaka phe beta tadila mambu ma minzibudi-nzila, bamisionere, minkengidi mikodiatanga bobo balembo sadila mu terituare yi filiale beni. Beta bongisa zikhutukunu zi fioti ayi zinene, beta tuadisa bisalu bi tunga Zinzo zi Kimfumu zi mona, ayi beta tula ngolo muingi minkanda mitula mu bimvuka bioso. Bisalu bioso bio bieta salu ku Biro yi filiale bidi muingi kisalu ki samuna kisalimina mu kambu divunzi.—1 Kolinto 14:33, 40.

• Phila mbi Komite yi filiale yeta sadisila Kimvuka kintuadisi?

• Kisalu mbi kieta salu ku Biro yi filiale?