Cani nuu ndaaniʼ familia Betel rúnicaʼ dxiiñaʼ ndaaniʼ gadxé gadxé departamentu para ganda gacanecaʼ guireeche diidxaʼ ndaaniʼ ti guidxi o ndaaniʼ stale guidxi. Ne rúnicabe dxiiñaʼ ra ribiʼxhiʼ diidxaʼ, ra raca imprimir, ra raca libru, ra riguixhe chaahuicabe libru ne revista o ra raca grabar videu ne discu, ne rácaruʼ xcaadxi dxiiñaʼ racá.

Ni runi Grupu ni Ruuyaʼ Modo Raca Dxiiñaʼ Betel. Grupu ni Zaniruʼ rusaana guiráʼ dxiiñaʼ ni raca ndaaniʼ ti yoo Betel lu náʼ ti grupu de chonna binnigola o jma, ni zuni dxiiñaʼ riʼ jneza. Ca binnigola ni nuu lu grupu riʼ, rábicabe Grupu ni Zaniruʼ pabiáʼ dxiiñaʼ cayaca ndaaniʼ ca guidxi ni nuu lu nácabe gúʼyacabe ne xi guendanagana zándaca guidxagalúcabe, nga racané Grupu ni Zaniruʼ guʼyaʼ xi gucaa lu ca libru ne revista ni chindee despué, ne xi gusiidiʼ lu ca guendaridagulisaa ni raca guiráʼ semana ne lu ca guendaridagulisaa roʼ. Gatigá ruseendaʼ Grupu ni Zaniruʼ tuuxa para cheʼ lugar stiʼ chiganna ca yoo Betel. Laacabe ruluíʼcabe ca Grupu ni Ruuyaʼ Modo Raca Dxiiñaʼ ndaaniʼ ca yoo Betel ximodo gúnicaʼ xhiiñacaʼ jma jneza (Proverbios 11:14). Ora rigánnacabe ca yoo Betel, raca ti reunión especial ra rutiidiʼ ti representante sti’ oficina central ti libana para uguu gana ca xpinni Cristu ni nabeza biaʼ ra runi tender Betel.

Racanécabe ca neza binni ridagulisaa. Ndaaniʼ cada yoo Betel ruuyacabe pa zanda guzulú xiixa neza binni ridagulisaa. Laaca ruuyacabe dxiiñaʼ runi ca precursor, ca misioneru ne ca superintendente de circuito ni nuu ca lugar ra runi tendércabe. Ne riguíxhecabe ximodo gaca guendaridagulisaa roʼ, riguíxhecabe ximodo cuíʼ ca Yoo stiʼ Reinu ne ruseendacabe libru ne revista ra nuu ca neza binni ridagulisaa. Guiráʼ ca dxiiñaʼ raca ndaaniʼ ca yoo Betel, racaneni para guireeche diidxaʼ jneza (1 Corintios 14:33, 40).

• Ximodo racané ca Grupu ni Ruuyaʼ Modo Raca Dxiiñaʼ ndaaniʼ ca Betel Grupu ni Zaniruʼ.

• Xi dxiiñaʼ raca ndaaniʼ cada yoo Betel.