Ti nɛngɔ ya “nzɔ̃ pa” a ɔ na seni ka tɛ “azi ti lɛ sese zu, ti ale zu, nga na ti yanga kɔdɔrɔ zu” ko, e ndo si na ambeti na ayanga a ɔ 750. (Suma 14:6) E ndo li kota kwa niko ngasia? Ayata mɛ Atɛmwɛ tɛ Yehova nvɛ̃ni mɛ ahĩnga sungɔ mbeti nzɔ̃ni na ala mɛ ahĩnga gbinyangbingɔ mbeti nzɔ̃ni a ɔ 3 300 ti lɛ sese zu la ndo za e.

Ando su ni uzu na Ngelesi. Bombi tɛ Adonzi la ndo ba ndo Departɛma ti Sungɔ ambeti mɛ ka kota biro ti États-Unis. Departɛma niko la ndo ba kwa ti departɛma tɛ awa sungɔ mbeti mɛ ndo li kwa ka mbɛni abiro nga na abiro ti filialɛ mɛ ndɛ. Ye mɛ ndo li ya mbeti tɛ e adɛ na bɛ azi ti lɛ sese zu adu ya, awa sungɔ ni alo ka ya kɔdɔrɔ ndɛ ndɛ ndɛ, ala ndo fa se du na se li ye ndɛ ndɛ ndɛ.

So pɛni ato ka tɛ awa gbinyangbingɔ. Se ala onzi sungɔ wɛ ko, ala ndo ba fani mɛ ndɛ, se ala hũ ya alengbi ko, ala to ni na lége ti Internet ka tɛ awa gbinyangbingɔ ti lɛ sese zu, ala gbinyangbi ni, ala ba ni na seni bwaí, ala di ti hĩngangɔ ya amangbi na ndia ti yanga ni. Awa gbinyangbingɔ “ndo gigi abɛta lo” mɛ alengbi ti nɛngɔ ya se kɔdɛ ko la asu na oko ti Ngelesi asi yango na yanga mɛ ala ndo gbinyangbi.​—Mosakoli 12:10.

Aordinatɛrɛ la ndo yapu na kwa ni. Ta ordinatɛrɛ alengbi ti mungɔ ndo tɛ wa sungɔ na wa gbinyangbingɔ ma. A bɛ se so ko, kwa ti ordinarɛrɛ ndo yapu na lomɛ ya ni ndo ba adiksiɔnɛrɛ, aye mɛ ndo za na gigingɔ nga na aye mɛ ndɛ mɛ ka ya ordinatɛrɛ. Atɛmwɛ tɛ Yehova asindó na prɔgramɛ ti ordinatɛrɛ mɛ ndo ili MEPS (système électronique d’édition multilingue), ndo za ayata na gbinyangbingɔ, na kpãngɔ alimɔ nga na lɛkɛngɔ ambeti na yanga gbala gbala wa masini asi na ni.

E ndo ho tɛrɛ e ti gbinyangbingɔ, abɛ se ayanga mɛ bo azi koto la ndo tɛnɛ ni na lo nɛ? Na lo mɛ ya se bɛ Yehova adu ya “azi ndɛ ndɛ ndɛ aso ko ala hĩnga bɛta lo na seni.”​—1 Timɔte 2:3, 4.

• Ando su ambeti tɛ e ngasia?

• E ndo gbinyangbi ambeti tɛ e na ayanga ma wo ma lo nɛ?