سبق 23
ساڈیاں کتاباں تے رسالے کیویں تیار کیتے جاندے نیں؟
اَسی ہر قوم، قبیلے، اُمت تے زبان دے لوکاں تک بادشاہی دی خوشخبری پہنچاؤنا چاہنے آں۔ ایس لئی اَسی 750 توں زیادہ زباناں وچ کتاباں تے رسالے وغیرہ تیار کرنے آں۔ (مکاشفہ 14:6) ایس کم لئی ساڈی تنظیم وچ اِک لکھائی دا شعبہ اے تے اِک ترجمہ کرن دا شعبہ اے۔ ایہناں شعبیاں دی مدد نال اَسی ایہہ اوکھا کم کر پاؤنے آں۔
مضمون پہلاں انگریزی وچ تیار کیتے جاندے نیں۔ گورننگ باڈی ساڈے ہیڈکوارٹر وچ لکھائی دے شعبے دی نگرانی کردی اے۔ ایہہ شعبہ ہیڈکوارٹر تے برانچاں وچ خدمت کرن والے کجھ بھراواں نُوں مضمون لکھن دی ذمےداری سونپ دا اے۔ کیونکہ ایہہ مضمون لکھن والے فرق فرق مُلکاں توں ہوندے نیں، ایس لئی ساڈیاں کتاباں فرق فرق ثقافتاں، مُلکاں تے زباناں بولن والے لوکاں دے دلاں نُوں چُھو لیندیاں نیں۔
ایہہ مضمون ترجمہ کرن والیاں نُوں گھلے جاندے نیں۔ لکھن توں بعد ایہہ مضمون پڑھے جاندے نیں تے فیر ایہناں وچ ضروری تبدیلیاں کیتیاں جاندیاں نیں۔ ایہدے بعد ایہناں نُوں کمپیوٹر دے ذریعے دُنیا بھر وچ ترجمہ کرن والیاں ٹیماں نُوں گھلیا جاندا اے۔ ترجمہ کرن والے بڑے دھیان نال اپنی ذمےداری نبھاؤندے نیں۔ اوہ سوہنے تے صحی لفظ چُن دے نیں تاکہ انگریزی وچ کہی گل دا پُورا پُورا مطلب اوہناں دی اپنی زبان وچ سمجھایا جائے۔—واعظ 12:10۔
کمپیوٹر دے ذریعے کم تیزی نال اَگے ودھدا اے۔ کمپیوٹر مضمون لکھن والیاں تے ترجمہ کرن والیاں دی تھاں تے نئیں لے سکدے، پر اوہناں دا کم سوکھا ضرور کر دیندے نیں کیونکہ ایہناں وچ ڈکشنریاں تے کھوج کرن لئی کئی پروگرام ہوندے نیں۔ یہوواہ دے گواہواں نے اِک کمپیوٹر پروگرام بنایا اے جدے ذریعے مضموناں نُوں سینکڑاں زباناں وچ ٹائپ کیتا جا سکدا اے، تصویراں نال جوڑیا جا سکدا اے تے چھاپن لئی تیار کیتا جا سکدا اے۔
اَسی کئی ایسیاں زباناں وچ ترجمہ کرنے آں جنہاں نُوں صرف کجھ ہزار لوک ای بولدے نیں۔ آخر اَسی اینی محنت کیوں کرنے آں؟ کیونکہ یہوواہ خدا دی دلی خواہش اے کہ ہر طرحاں دے لوک نجات پاؤن تے سچائی دا صحی علم حاصل کرن۔—1-تیمُتھیُس 2:3، 4۔
-
ساڈیاں کتاباں تے رسالے کیویں تیار کیتے جاندے نیں؟
-
اَسی سینکڑاں زباناں وچ ترجمہ کیوں کرنے آں؟