Igen kamas te zvestinel e lačhi sprava: Savore narodenge, savore kmeňenge, savore čhibenge the manušenge. Vašoda das avri biblicka časopisi the kňižki buter sar andro 750 čhiba. (Zjaveňie 14:6 NZ) Ko amenge pomožinel? O pisaťeľa andal calo svetos the ola, so prethoven andre aver čhiba. Savore hine le Jehovaskere svedki.

Pisinel pes andre anglicko čhib. Andro hlavno betel, andro USA, hin e redakcija (čiže e kancelarija), kaj pes pisinel e literatura. O phrala, so ľidžan amari organizacija, dodikhen pre lakeri buťi. E redakcija pes starinel pal e buťi le pisaťeľengeri, so služinen andro hlavno betel the andre varesave pobočki. Ala pisaťeľa hine andal but narodi. Vašoda, so pisinen, šaj džal andro jilo but manušenge pal calo svetos.

Prethovel pes andre aver čhiba. Sar hiňi e literatura pisimen a schvaľimen, prekal o internet pes bičhavel le phralenge pal calo svetos, so la prethoven. On ada prethovena andre peskeri čhib; skontroľinen, či pes mište prethoďa a prikeren o gramaticka chibi. Snažinen pes te kidel avri čačipnaskere lava avka, kaj andal e angličťina te prethoven andre peskeri čhib so nekfeder a ňič te na mukhen avri. (Kazateľ 12:10)

O počitača pomožinen, kaj pes te kerel sigeder. O počitačis hino ča strojos, našťi el feder sar džido manuš, so pisinel či prethovel e literatura andre aver čhib. No, the avka o počitačova programi the o slovňiki kampel paš adi buťi. Le Jehovaskere svedki kerde počitačovo programos, so pes vičinel MEPS. Ada programos džanel te pisinel o tekstos le pismenkenca, so hine andro stovki čhiba; te spojinel, so hin pisimen le obrazkenca a te pripravinel e literatura, kaj la šukares te vitlačinen.

Soske pes kerel savoro prekal ada, kaj pes e literatura te prethovel the andre ajse čhiba, save džanen ča asi 1000 manuša? Bo o Jehovas kamel, [kaj] savore manuša te en zachraňimen a te prindžaren o čačipen. (1. Timoteoske 2:3, 4 NZ)

• Sar pes pisinel amari literatura?

• Soske prethovas amari literatura andre ajci but čhiba?