Koe‘uhi ke fai homau lelei tahá ke talaki ‘a e “ongoongo lelei” ki he “pule‘anga mo e matakali mo e lea mo e kakai kotoa pē,” ‘oku mau fa‘u ai ‘a e ‘ū tohi ‘i he lea ‘e 750 tupu. (Fakahā 14:6) ‘Oku anga-fēfē ‘emau lava‘i ‘a e ngāue faingata‘a ko ení? ‘Oku mau fai ia ‘i he tokoni ‘a ha kau ngāue hiki tohi fakavaha‘apule‘anga mo ha kulupu ʻo e kau liliu lea lī‘oa​—ko e Kau Fakamo‘oni ‘a Sihova kotoa.

Ko e mu‘aki konga tohí ‘oku teuteu‘i ia ‘i he lea faka-Pilitāniá. ‘Oku tokanga‘i ‘e he Kulupu Pulé ‘a e ngāue ‘a e Potungāue Hiki-Tohi ‘i homau ‘ulu‘i ‘apitanga ‘i he māmaní. ‘Oku fokotu‘utu‘u ‘e he potungāue ko ení ‘a e ngaahi ngāue ‘a e kau hiki-tohi ‘oku ngāue ‘i he ‘ulu‘i ‘apitangá pea ‘i he ngaahi ‘ōfisi va‘a kehekehe. Ko hono ma‘u ha kau ngāue hiki-tohi kehekehé ‘oku malava ai ke mau ngāue ki he ngaahi kaveinga ‘i he ngaahi anga fakafonua kehekehe, ‘a ia ‘okú ne ‘ai ‘a ‘emau ‘ū tohí ke fakamānako fakavaha‘apule‘anga.

‘Oku ‘ave ‘a e konga tohí ki he kau liliu leá. Hili hono fakalelei‘i pea tali ‘a e fakamatala kuo hikí, ‘oku ‘ave faka‘ilekitulōnika ia ki he ngaahi timi ‘o e kau liliu lea takatakai he māmaní, ‘a ia ‘oku nau liliu, vakai‘i, pea lau mo siofi ‘a e kalama ‘o e konga tohí. ‘Oku nau feinga mālohi ke filifili ‘a e “ngaahi fo‘i lea totonu ‘o e mo‘oní” ‘a ia ‘e ma‘u ai ‘a e ‘uhinga kakato ‘o e lea faka-Pilitāniá ‘i he‘enau leá.​—Tangata Malanga 12:10.

‘Oku fakavave‘i ‘e he ngaahi komipiutá ‘a e ngāué. ‘Oku ‘ikai lava ‘e ha komipiuta ‘o fetongi ‘a e kau hiki-tohi mo e kau liliu lea fakaetangatá. Kae kehe, ko ‘enau ngaahi ngāué ‘e lava ke fakavave‘i ia ‘aki hono ngāue‘aki ‘a e ngaahi tikisinale kuo fakahū ki he komipiutá, mo e ngaahi fakamatala fakaefekumi. Kuo fa‘u ‘e he Kau Fakamo‘oni ‘a Sihová ha Sisitemi Pulusi Faka‘ilekitulōnika ‘i he Ngaahi Lea Lahi (MEPS) ‘a ia ‘e lava ke fakahū ‘a e konga tohí ‘i he ngaahi lea ‘e lauingeau, ‘o fakataha‘i mo e fakatātā ‘oku ‘omai aí, pea fokotu‘utu‘u fakapeesi ki hono pulusí.

Ko e hā ‘oku mau fai kotoa ai ‘a e feinga ko ení, na‘a mo e ‘i he ngaahi lea ‘oku lea‘aki pē ‘e he kakai ‘e laui afe si‘i? Koe‘uhí ko e finangalo ia ‘o Sihová “ke fakahaofi ‘a e fa‘ahinga kakai kotoa pē pea ke nau a‘usia ha ‘ilo totonu ki he mo‘oní.”​—1 Tīmote 2:3, 4.

• Ko e hā ‘a e ngāue ‘oku kau ki hono hiki ‘o ‘emau ‘ū tohí?

• Ko e hā ‘oku mau liliu ai ‘emau ‘ū tohí ki he ngaahi lea lahi faú?