«Янзы-бүрү дылдарлыг сөөк-язы, аймак-чон бүгүдезинге» буянныг медээни медеглээр дээш, дептерлерни 700 ажыг дылдарда үндүрүп турар бис (Ажыдыышкын 14:6). Ол канчап болдунуп турарыл? Бүгү делегейде бисте дыка хөй бижикчилер болгаш томуйлаттынган очулдурукчу бөлүктер бар. Олар шуптузу Иегованың Херечилери-дир.

Сөзүглел эгезинде англи дылга бижиттинер. Бижилге килдизи делегей чергелиг кол башкарылга черинде турар, ону Удуртукчу чөвүлел харыылап турар. Ол килдис кол башкарылга черинде болгаш салбырларда бижикчилерниң ажылын удуртуп турар. Бижикчилер аңгы-аңгы чурттарда чурттап турарының ачызында бистиң дептерлеривисте янзы-бүрү номчукчуларны сонуургадыптар темаларны чырыдып турар.

Сөзүглелди очулдурукчуларже чоргузуп турар. Эттинген болгаш чөпшээреттинген материал бүгү делегейде очулга бөлүктеринче электроннуг хевирге чоргустунуп турар. Очулдурукчулар сөзүглелди очулдургаш, англи сөзүглел-биле дүүштүргеш, частырыгларны эдип турар. Олар «шынның сөстерин» шилип, англи сөзүглелдиң утказын боттарының төрээн дылынга ылап шын дамчыдарын кызып турар (Экклесиаст 12:10).

Компьютерлер ажылды шуудадып турар. Компьютер бижикчилерни-даа, очулдурукчуларны-даа солуп шыдавас. Ынчалза-даа компьютер янзы-бүрү программаларның, электроннуг сөстүктерниң болгаш энциклопедияларның ачызында ажылды дүрген шуудадырынга дузалап турар. Иегованың Херечилери «Хөй дылдыг электроннуг үндүрүлге системазын» (MEPS) чогааткан. Ооң дузазы-биле очулдурган сөзүглелди чүс-чүс дылдарга парлааш, чуруктар-биле кошкаш, үндүреринге белеткеп турар.

Каш борбак муң кижиниң чугааланып турар дылдарынче библейжи дептерлерни очулдурар дээш, ынча хөй күжениишкиннерни чүге үндүрүп турар бис? Чүге дизе Иегова «бүгү улустуң камгалалды алырын база алыс шынны билип аарын күзеп турар» (1 Тимофейге 2:3, 4).

• Бистиң дептерлеривис канчаар бижиттинип турарыл?

• Ынча хөй дылдарже дептерлеривисти чүге очулдуруп турар бис?