Hiki ñwii, ntôñ wés u mpémés didun di Bibel ni bikaat bipe, di kabak ki gwo yañga. Di ñoñ ni tibil mandap més ma likoda ni bi Bétel. Di nit dikôô di bôt ba nsal i Bétel ni basañal ba tôbôtôbô ba nlôl i biloñ bipe. Di nlona ki mahôla ngéda bikuu bi nkwo. Ndi u yé le u badba le, hee di nyôñôl moni inyu boñ mam mana momasôna?

Di gwé bé nsul to njañgi. To hala ki bôlô yés i nlôôha diye, di mbat bé moni. Iloo mbôgôl ñwii, Nkum Ntat wés nu yônôs iba u bi kal le kiki di nhémle le Yéhôva a nit bés mu nson u, jon di nyagal bé to bem mahôla ma mut. Kiki Nkum Ntat nu a bi pot, la nyen di ngi boñok i len ini.​—Matéô 10:8.

Makébla ma njômbi lam mon ma nit bôlô yés. Ngandak bôt i ndiihe biniigana gwés bi Bibel, jon ba nti makébla ma njômbi lam. Mbôgi Yéhôva yomede i nti ni ñem wonsôna ngéda yap, ngui yap, bigwel moo gwap inyu boñ le sômbôl Djob i bôña ni nkon isi wonsôna. (1 Miñañ 29:9) I Mandap ma Ane tole i makoda més makeñi, ngandak i yé maséé i ti makébla mu i dikukuu. Mut a nla ki ti makébla ni njel site yés i internet, le jw.org. Jôga li makébla ma, ma nlôl yak bôt ba ba ta bé mingwañ. Ba noñ ndémbél i hiyeyeba hi yik muda hi Yésu a pôdôl loñge, a kal le a bi ha disiinaga di moni diba ikété nkuu makébla. (Lukas 21:1-4) Hala ni nyen, hiki mut a nla yoñ lem i tééda ndég jam kiki a “nkit i ñem wé” inyu boñ le a ti likébla jé ni maséé.” ​—1 Korintô 16:2; 2 Korintô 9:7.

Di yé nkwook nkaa le Yéhôva a ga tinde miñem mi bet ba nsômbôl ‘ti nye lipém ni nkus wap’ inyu boñ le nson Ane ni sômbôl Djob bi bôña.​—Bingéngén 3:9.

• Kii i mboñ mahéñha ipôla ntôñ wés ni bibase bipe?

• Lelaa ntôñ wés u ngwélél makébla ma njômbi lam?