Wɔ̃ɔ baagere, bɛsɛn yigbɛru ta ra Bibeli ka kparanu yakom dabinu yare kpa tu ni bɔnu ko, ta ra maa ye ko ta n kun goo gobi kanɛ. Sa Bandu Yenu ka bɛsɛn sin yenu banimɔ, sa maa ganu sɔmmɔ. Be ba sɔmburu mɔ̀ Betɛliba sɔɔ, ka swaa gbiiyo be ba mɔrisia tem gam, sa ben bukata yibiamɔ; sa ra maa ka bɛsɛn kĩnasibu somiru daawe yen saa sɔɔ mi kari baka kua. Sɔrɔkudo kaa tii bikia: “man diya gobi yi wee ba ka yeniba kpuro mɔ̀?”

Sa ku ra “wɔkuru baateren wɔllɔ tia” bikie, sɔke sɔke maa sari. Baa mɛ bɛsɛn waasun sɔmbura gobi dimɔ too, sa ku ra gobi kanɛ. Yen wɔ̃ɔ wunɔbu ka sɔndiru wee tɛ̃, bɛsɛn tire te ba mɔ̀ La Tour de Garde n kpararu yiruse sɔɔ, ba gerua ma sa naanɛ sãa ma Yehofawa sãa bɛsɛn tãsi yeru; yen sɔ̃ sa ǹ nɔna dɔɔ, sa ǹ maa dɔɔ tɔmbun mi su somiru kana pai. Mɛya n maa sãa ka gem!—Mateu 10:8.

Gɔ̃ru kĩrun kɛ̃ra sa ka bɛsɛn sɔma wuswaa daasiamɔ. Tɔn dabina ra bɛsɛn Bibelin keun sɔ̃ɔsinu siare, yen sɔ̃ ba ra kɛ̃nu ko bu ka ye nɔma kɛ̃. Seeda Diobun tii, ka nuku doba ba ra ben saa, ben dam, ben gobi, ka maa ben mɔru loo ko bu ka Gusunɔn kĩru ko tem kpuro sɔɔ. (1 Bandun Gari 29:9) Bɛsɛn Bandu Yenɔ ka mi sa ra mɛnnɔ bakasu ko, kpakoro piibunu ra n wãa, ni sɔɔ wi u kĩ kpuro u koo kɛ̃ru ko. Wi u maa kĩ, u koo kpĩ u kɛ̃ru ko saa bɛsɛn intɛɛnɛtin ayerun di, jw.org. Gobi yi sa ra wa yen dabina ra n weewa saa ben mɔra kun kpãn min di, nge kurɔ gɔmini sãaro win gari Yesu u kua. Kurɔ wi, gobi piiminu yiruwa u kpɛ̃ɛ sãa yerun kpakororu sɔɔ, ma Yesu u ye siara. (Luku 21:1-4) Yen sɔ̃ baawure koo kpĩ u n da baadomma “gobi gɛɛ yi nɛnɛm,” u ka ko “nge mɛ u gɔ̃ru doke.”—1 Korinti 16:2; 2 Korinti 9:7.

Sa sire ma Yehofa ko n bɔ u n tɔn be ba kĩ bu nun bɛɛrɛ wɛ̃ ka ben gãa gobiginun gɔ̃ru babamɔ, kpa bu na bu ka Gusunɔn Ban ten sɔmburu wɔlle sua, kpa win kĩru tu koora.—Mɔnnu 3:9.

• Mba bɛsɛn yigbɛru ta ka sãa ni nu tie wunanɛ?

• Amɔsunwa ba ka gɔ̃ru kĩrun kɛ̃ɛ ni loo mɔ̀?