El diamon organizacion ta hace y ta distribui millones copia de Biblia y otro pa maga publicacion cada año que nuay pago. Ta construi y ta mentena kame maga Kingdom Hall y oficina del maga Testigo de Jehova. Ta suporta kame miles de maga Bethelite y misionario y ta ayudá kame con aquellos quien ta queda victima na calamidad. Poreso baká preguntá tu, ‘Onde estaba el de ustedes pondo?’

Gendeh kame ta colecta, ta cubra o ta saca dies por ciento. Maskin pa grande el gasto na diamon trabajo predicacion, gendeh kame ta pidi sen na maga gente. Mas de un siglo ya el ya pasa, el segundo edicion de Watchtower ya habla que ta creé kame que si Jehova el quien hay suporta kanamon y “nunca hay pidi limosna ni ayuda na maga gente” el diamon organizacion—y nuay gayot kame se hace!—Mateo 10:8.

Ta suporta con el diamon trabajo por medio del voluntario donacion. Manada maga gente el ta aprecia con el diamon trabajo de educacion que basé na Biblia y ta dale donacion para suporta con ese. El maga Testigo mismo alegre dale el diila tiempo, fuerza, pondo y otro pa cosa para suporta con el hacida del voluntad del Dios na entero mundo. (1 Cronicas 29:9) Para con aquellos quien quierre dona, tiene maga cajon de donacion na Kingdom Hall y na diamon maga asemblea donde puede hace cai el diila donacion. Puede tambien ustedes dona por medio na diamon website, el jw.org. Mas mucho del maga donacion estaba con aquellos gendeh rico. Ta semeja sila con el un pobre viuda con quien ya comenda si Jesus cay voluntario y estaba na corazon el de suyu donacion. (Lucas 21:1-4) Poreso, maskin quien puede “aparta cen” para dona asegun na “cosa le ya decidi na disuyo corazon.”—1 Corinto 16:2, El Nuevo Testamento; 2 Corinto 9:7.

Convincido kame que si Jehova hay continua motiva con aquellos quien quierre ‘honra con ele por medio na diila maga precioso cosas’ que suporta con el trabajo del Reino para cumpli el de suyu voluntad.—Maga Proverbio 3:9.

• Porque diferente el diamon organizacion na otro maga religión?

• Donde ta usa con el maga voluntario donacion?