˗Kwɛ ˈˈpɛpɛ ˈka, yi ˗bha ˗kɔlokota ˗yö Biblö waa ˈsëëdhɛ ˈˈmliɲɔn ꞊va ˗kë, ˈö ˈyi ˗an ˗gblü mɛn ˗nu ˗ta ˈˈwɛɛwɛ. Yi ˗Bhɔkwëëkëgükɔ waa Betɛlö ˗nu dɔ ˈö ˈyi yi ˗zokë ˗an ˈˈpiʋ̈. Yi yi ˗kɔ ˗da ˈpö Betɛlö ˈgümɛn waa bɔmɛn nu ˈˈgblü ꞊va, ˈwo mɛn nu takun, ˗an ˗dhɛ. Ü ꞊mɔɔn˗ ˗bha ˈü ü ˗de dhɛɛˈˈ ˈkpɔ ꞊dhɛ yi go ˈwëëga ˈka ˈmɛn?

ˈYaa ˈnii˗ sɔnŋ ɛɛnˈˈ ˈwëëga bho. ˈWëëga ˈyi˗ ˗sü, ˈyi yö ˗kë ˗a ˈka bhë, ˗yö ꞊va, ˈˈkɛɛ ˈyaa˗ ˗gbadhɛ mɛn ˈbha ˗gɔ. ˗Yö pö ˗sü ˈka La Tour de Garde ˈö yö ˈˈkpɛnŋ ˗kwɛ 1879 ˈgü ꞊dhɛ “˗Yö ˗ga sü ˈka yi ˈgü ꞊dhɛ Zoova ˈnën ˗tɔ yi ˗takunmɛn. ˗A ˗wɔn ˈgü, ˈyi ˈdho yi ˗zoyö mɛnbhɩɩ ˗dhɛ ɛɛnˈˈ ˈyi ˈdho ˈwëëga ˗dhɛ ˗an ˗gɔ toŋtoŋdhö.” Yi ˈto yi ˗wo ˗ta!—Matiö 10:8.

˗A gbɔɔ ˈnën ˈwo˗ ˗kë yi ˗gɔ ˈˈwɛɛwɛ. Mɛn ˗nu ꞊klaŋ ˈö ˈyi˗ ˗kë ˗Zlan ˗Wo ˈka bhë, ˗yö mɛn ˗nu ˗dhɛ ˗së. ˗A ˗wɔn ˈgü ˈyö ˈwo gbɔɔ ˗kë yi ˗gɔ kë ˈˈdhʋ̈ kö ˈyi ˈdho a ˈka ˈˈdhiʋ̈. ˗Yö ˗dhi Zoova ˗bha ꞊Gbɛkiö ˗nu ꞊dede ˗dhɛ kö ˗wo wo ˗bha ˈˈtʋ̈ŋ, wo ꞊faan, wo ˗bha ˈwëëga ɛɛnˈˈ pë ˈˈwɛɛ ˈbha ˈsü kë ˈˈdhʋ̈ kö ˗Zlan dhɔɔbhaawɔn ˗yö kë ˈˈkpɔnŋtaadhɛ ˗todhʋ̈sü ˗ta. (1 Chroniques 29:9) Yi ˗bha ˗bhɔkwëë ˗nu ɛɛnˈˈ ˗bhɔkwëë ˈˈgblʋ̈gblʋ̈ ˗nu ˈˈtʋ̈ŋ ˈka, mɛn ˈwo˗ ˈˈpiʋ̈, ˗wo ꞊mɔɔn˗ ˗bha kö ˗wo ˈwëëga ˗da ˈwëëgadagüpë ˗nu ˈgü, ɛɛnˈˈ ˗wo ꞊mɔɔn˗ ˗bha kö ˗wa bɔ yi ˗bha ɛntɛnɛtö ˈˈnimlɔn jw. org ta. ˈWëëga ˈkpiidhɛ, ˈyi˗ ꞊slɔɔ bhë, ˗yö ˗go ˈˈflɛɛmɛn nu ꞊kwɛɛ˗. Mɛn nu ˈwo gbɔɔ ˗kë bhë, ˗wo ꞊dhɛ ꞊gɛandhö ˈö Yesu ˗ya ˗wɔn ꞊blɛɛ bhë ˗a ˈdhö, ˈyö ˗tɔ ꞊dhɛ ˈˈtanmaga ꞊plɛ ˈnën ˈyö ˗an ˗da ˈwëëgadagüpë ˈö ˗Zlan ˗dhɔkëgükɔ ˈgü bhë, ˗a ˈgü. (Dhukö 21:1-4) ꞊Ya kë ˈˈdhʋ̈, mɛn ˈö ˈdhö, ˗yö ꞊mɔɔn ˗a ˗bha kö ˈwëëga ‘ˈdhɛ ˈö˗ ˗ya ö ˗zʋ ˈˈpiʋ̈’ kö ˗ya gbɔɔ, ˗a “˗ya ˗dɩ ˗ta.”—1 Kodhɛngtö 16:2; 2 Kodhɛngtö 9:7.

˗Yö ga ˗sü ˈka yi ˈgü ꞊dhɛ Zoova ˗dho mɛn ˗nu ˈwo ˈˈpiʋ̈ kö “˗wa ˈtɔ bhɔ wo bha ꞊nɔɔn pë ˗nu ˈka” kö ˗wo wo ˗kɔ ˗ya ˗a ˗bha ˗Gblüdëdhɛ ˗yö ˗gɔ, kë ˈˈdhʋ̈ kö ˗a dhɔɔbhaawɔn ˗yö kë, ˗an zuʋ̈ˈˈ ˗blü gbɔɔ kë ˗sü ˗bha ˗kpɛɛwo.—Proverbes 3:9.

• ˗Mën ˈö yi bho ˗zlanwo ˈˈwɛɛ ˗nu ˈˈpiʋ̈?

• Gbɔɔ ˈö mɛn ˗nu ˗wa ˗kë yi ˗gɔ bhë, ˗mën ˈyi˗ ˗kë, ˗a ˈka?