Mbu te̱, bebokedi basu be mabusise̱ bebwea ba lodun la Bibe̱l, na yine̱ kalati yena ba mabolano̱ bato tete. Di malonga, di po̱ngulane̱ pe̱ Mandabo ma Janea na Bete̱l. Di masue̱le̱ pe̱ lokoli la babole̱ ebolo o Bete̱l, bamuloloma ba mawe̱ o bekombo bepe̱pe̱, na ba bena ndenge̱ i kweledino̱. Nde we̱ni mu mo̱ni mo̱ mu mawano̱ e?

Di si mabaise̱ dongo diwo̱ la dom, to̱ ńakisane̱ moto, to̱ njangi. To̱ nika sue̱le̱ l’ebol’asu ya dikalo di mabaise̱no̱ mo̱ni jita, di si mańakisane̱ bato o bola biso̱ mo̱ni. Ye we̱nge̱ buka ebwea mbu kalat’asu ńa mo̱di ni belabe̱ na Njongo a Betatedi, e tele̱ye̱ ná, je mbaki ná Yehova mo̱me̱ne̱ nde a masue̱le̱ ebol’asu, di si maso̱so̱me̱ye̱ ońola jongwane̱ la mo̱ni. Di si me̱nde̱ pe̱ to̱ so̱so̱me̱ye̱ to̱ buńa.​—Mateo 10:8.

Bebolo basu be suabe̱le̱ nde na mabea ma wonja. Jita ba mabwane̱ ebol’asu ya belēdi o wase ńe̱se̱ muńe̱nge̱, ba masue̱le̱ pe̱ mo̱ esibe̱ mińakisan. Biso̱ mo̱me̱ne̱ pe̱ je muńe̱nge̱ o bola pond’asu, ngiń’asu, mo̱ni masu, na mambo mape̱pe̱ o bwam ná Jemea la Loba di bolane̱ o wase ńe̱se̱ na bam. (1 Myango 29:9) O Ndabo a Janea nikame̱ne̱ pe̱ na bepolo ba mako̱to̱ne̱, nu to̱ndi te̱ e ná a we̱le̱ nje a mapulano̱ o belimbi ba mabea ma wonja. Mabea ma wonja me ná pe̱ ma bolabe̱ tongweana mulomba masu, jw.org. Dongo dinde̱ne̱ la ma mabea ma wonja di mawa nde o mā má ba ba si be̱n bekusedi jita ka mu mukusa ma muto Yesu a kwalino̱, nu we̱le̱ bepasi ba kapa beba ka lao jabea la wonja. (Lukas 21:1-4) Mō̱ na mō̱ ńasu te̱ e so̱ ná, a “ne̱nge̱ o mbo’ao nje a we̱lino̱” ná “a bole nde kaponda jo̱nge̱le̱ la mulema mao.”​—1 Korinto 16:2; 2 Korinto 9:7.

Je mbaki ná Yehova a mabenga tute̱le̱ milema ma ba bato̱ndi bole̱ mo̱ edube na mambo mabu ma tiki, o sue̱le̱ ebol’a Janea, o bwam ná Jemea lao pe̱ di bolane̱.​—Minia 3:9.

• Njika diwengisan le oteten a bebokedi basu na bene̱ bebasi e?

• Ne̱ni di mabolane̱no̱ mabea ma wonja e?