Hitaande kala meɗen winndude e meɗen sennditude defte cewɗe e Deftere Allah nden e nder haalaaji buy hoore dokkal. Meɗen darnude e meɗen kippude Fottirɗe Seedeeɓe Yahuwah ɓen e yiilirɗe kippuɓe fii waajagol ngol. Men wallay ɓee wonuɓe ka Bayti’iila, imminaaɓe ɓen e musiɓɓe amen ɓen wonduɓe e tampere. Hara hiɗon miiji : “ ko honno ɗun ɗoo fow yoɓirantee ? ”

Men ƴantataa kaalisi e men lanndotaako hay gooto yoɓugol. Fii kala golle amen ɗen no satti coggu, kono men lanndotaako hay gooto fii kaalisi. Ko yahata ɗuuɓi 100 ɓawto ɗoo, deftere inneteende La Tour de Garde e haala faransi ko yaltuno ɗiɗabere wi’uno, ko Yahuwah woni men wallude, ko ɗun waɗi men lanndotaako maa men toroo ballal tagaaɗo. — Matta 10:8.

Golle amen ɗen ko e hoore dokkal anniyee ɗe yoɓirantee. Yimɓe buy no weltii fii ndee jannde Deftere Allah nden, ko ɗun waɗi hiɓe waɗude dokkal kaalisi. Seedeeɓe Yahuwah ɓen kadi gollay, ɓe okka saa’i maɓɓe e doole maɓɓe, ɓe waɗa dokkal hoore anniyee fii no faale Yahuwah on no waɗira e nder aduna fow (1 Fillande taarika 29:9, TMN). Ka Fottirde Seedeeɓe Yahuwah ɓen e ka mottondire amen, keesuuje no woodi fii dokkal e hoore anniyee. Maa hiɗon waawi waɗude dokkal hoore anniyee ka jokkorde amen enternet, jw.org. Kaalisi ko men heɓata kon, ko ɓuri kon ko yimɓe ɓe alaa hay huunde woni waɗude dokkal hoore anniyee wano oo debbo keynguujo mo annabi Iisaa haali fii mun. O waɗuno dokkal tammahoy ɗiɗoy ka nder keesuwal juulirde (Luuka 21:1-4). “ Yo mo kala e mon heɓu ko anniyii ” fii no o okkira “ wano o anniyori non ka ɓernde makko ”. — 1 Korenti 16:2 ; 2 Korenti 9:7.

Meɗen hooli Yahuwah wallay ɓee faalaaɓe waɗugol dokkal hoore anniyee, no ɓe jokkira waɗugol ɗun fii no innde makko nden hormoree e faale makko on no waɗira e nder aduna on fow. — Tindi 3:9, TMN.

• Ko honɗun sertindini men e diinaaji goo ?

• Honɗun men waɗata ngal dokkal kaalisi ko waɗetee kon ?