Kwəlan ɉəli pələ tɛi-tɛi, kwa Biblə miliɔn damaa ɲaakwɛlɛ nua diɛ, da kalan ɉɛɓɛ takpɛliɠaa. Kwa ŋaakpɔn gɛ pɛlɛɠaa da Betɛɛliɠaa tɔɔ, kuɔ di hon a nɛlɛɛ. Kwa nwea pələi kalan gɛ nua tamaa da Betɛɛli mu nua tamaa maa mɛni ɲɛi kulɔ, ə lɛɛ kɛɛ a kala nua diɛ kwa kpɔnmaa tɛɛ di pɔ. Ya kɛ kiɛ ə́ kpɔɔ maaləngɛi yɛ kɛ ma : Gólóɠaa tii kɛ wali a hɔlɔɓo minɛ ?

Ku hwa diimə kulɔ, ku hwa kɛɛti kɛ. Pələi ma kwa wali kwɛlɛ la kɛnɛ ku wɔ kólóɠaa kɛ mɛni ɓa, ku hwa wali kulɔ nua diɛ. Aa kɛ kea a kwəlan nwun dɔnɔ da da, ku mo La Tour de Garde hu kuɔ ma : Zehova lɔ ɓə ku kili tɔɔ ma kpɔnmaa tɛɛ mɛni ɓa ku pɔ, ku ho pai tinɛn ɉii nukanŋaa pɔ pələ kpɔnmaa tɛɛ mɛni ɓa ku pɔ. Ə lɛɛ nwoo tii ku mo kwaa bɔ mɛni kɛ ! — Matie 10:8.

Nua da di yee hee ku wɔ kólóɠaa mu a kɔɓo hɛnŋaa. Ku wɔ kalan gólói wɛli a too nu tamaa ɓa, da gaa diɛ kóló lɛlɛɛ li, ə lɛɛ da kɔɓo hɛnŋaa tɛɛ ku pɔ yili maa mɛni ɓa. Zehova ŋɔ Kəlaɠaa diɛ kpinii da di wɔ lowai həɠə ɉu, da di hwaŋa, ə lɛɛ di yəi hɛngɔuɠaa Yálá liiɓa kɛ mɛni ɓa lɔi mɛi naa kəlee (Kolonikə dɔlɔɔ 29:9, TMN). Kəhi pɛlɛɛɠaa kaa ŋaakpɔn gɛ pɛlɛɠaa mu ə lɛɛ ŋaakpɔn gbea-gbeaɠaa ɓa, nua di kaa bɔ di mɛinɛɛ kɛ, da pɛli di wali too gəhi pɛlɛɛɠaa tii hu. Nua yiiɠaa di ho ɓaa hɛngɔu namənaa, diɛ ɓə da nwali mɔlɔmun dɛɛ. Da gɛ lɔ yɛ pələi galanin nɛɛnui ŋɛi kɛ a yee howolo mun ə gɛ la. Zesu ə nɛɛnui tii maa mɛni lɛlɛɛ ɓo, maahɔlɔɓo nwali kɔu pɛlɛɛ hweelɛi lɔ kɛ ɲəi, ya ɓə ə doo ɉɛn ɲaŋa hu Yálá hwɛli pɛlɛ mu (Lukə 21:1-4). Yili ɓa, nu tɛi-tɛi a pɛli hɛn dawolo laakɛi gwɛlɛ, yɛ dɛɛ “ yɛ pələi ŋɔ kiliŋahiɛ kaa la ”. — Kɔlɛntə dɔlɔɔ 16:2 ; Kɔlɛntə veelɛnaa 9:7.

Nua kpɔ di kaa bɔ di Zehova maawiɛ a di “ yəi hɛnŋaa yiiɠaa di maa mɛni wala-walaa ” ku laa na kuɔ ma Zehova kaa pai di hwaŋalɔi di yee hee mɛni ɓa ŋɔ Tɔɔlaa maa kóló mu, ə gɛ niiɓa ə kɛ. — Haŋɔn 3:9, TMN.

• Lə ɓə a nɛ yɛ kwa kalan dakpɛliɠaa ku ho tɔnɔn ?

• Lə ɓə kwa gɛ a kɔɓo hɛnŋaa ?