Wiitari manukakɨkatsíe Jehová Niukíeya temɨkuxaata, waɨkawa xapate tepanayenenetɨwa metá teuteri tepɨwatahuritɨwa tekaʼituatɨ; teputiwewiwa kí temuyukuxexeɨriwatsíe, sucursal meutiʼutɨká metá ʼaixɨ tepikuyuruwa; tsiere tepɨwapareewie betel memɨtepareewie, misionerotsixi metá pareewiya tepenɨʼawá taʼiwama haxa memɨteʼanuyekɨkatsíe. ¿Tumini tá keraneika mɨkɨ naimetsíe temɨteʼayeʼatɨwanikɨ?

Tumini tepɨkawawá. Tseepá tumini waɨkawa teteʼutixɨxɨtɨwa Yuútsi Niukíeya tekuxaatatɨ, teuteri tumini teukawawawirie. 100 wiitari panuyemie rí, hutarieka Atalaya manayenetsíe pɨreukuʼuxakai, Jehová yeme pɨtatsipareewie. Metá painekai: «[Yuútsi kiekarieya] hatsuaku tumini teuteri pɨkawatawawirieni». Metá mɨpaɨ pɨtiʼane (Mateo 10:8).

Tumini mepɨyetuaya kememɨteheuyɨwawe. Waɨkawa teuteri pɨwanaake hiipame ketemɨtewakupareewiwa, ʼayumieme tuminikɨ mepɨtekupareewiwa kememɨteheuyɨwawe. Jehová temayexeiya tsiere tepɨtepareewie tatuukaari teyetuayatɨ, tatɨrɨkariya, tsiere tumini tepɨyetuaya ketemɨteheuyɨwawe, mɨpaɨ Yuútsi Niukíeya mayeʼaxenikɨ naime kwieepatsíe (1 Crónicas 29:9). Kiitá taɨtá temayutixexeɨriwatsíe metá hakewa waɨkawa temuyukuxexeɨriwatsíe, caja puyexuawetɨká keane yamɨraʼeriwani pɨyɨwe tumini muwa mɨyetuani. Nutsɨ tsiere pepɨtiupareewiwe tasitiota jw.org. Viura mɨtiuyuri hepaɨ, tseepá waɨkawa tumini mɨkayetua mɨpaɨ tsiere keane waɨkawa memɨkatehexeiya mepɨteyurié, kememɨteheuyɨwawe mepɨtepareewie (Lucas 21:1-4). Pɨyɨwe tuminikɨ mɨtiupareewieni «yuʼiyaaritsíe paitɨ kemɨreunakeʼerieka» (1 Corintios 16:2; 2 Corintios 9:7).

Tepɨteʼaamaté Jehová pɨtikuyuruwa teuteri memɨteyetuayani kememɨteheuyɨwawe tita memɨtehexeiya, mɨpaɨ matsi waɨkawa Yuútsi Niukíeya mɨyukuxatanikɨ naime kwieepatsíe (Proverbios 3:9).

• ¿Títakɨ Yuútsi kiekarieya hiipame wahepaɨ katiumié?

• Tumini mɨyetuiwá ¿kekuʼitɨariwa?