Ongamburiro yetu, mombura aihe i pitisa nokuhandjaura ozOmbeibela omangete omengi nomambo warwe nokuhina okusutisa. Eṱe tu tunga nokuṱuna Omatuwo wOmerikotameneno notutavi twomberoo. Tu vatera ovandu mbe ungura mObetel novahindwa nu tu yandja ombatero motuveze twoumba. Ove ngahino mo ripura kutja, ‘Ovimariva vyokusuta oviṋa avihe mbi tu isa pi?’

Eṱe katu ṋiṋikiza ovandu mombongo okuyandja ovimariva nu katu sutisa otjitjamurongo. Nandarire kutja okukayendisa oviungura vyetu ku hepa ovimariva ovingi, eṱe katu ningire ovimariva kovandu poo okuveṋiṋikiza okuyandja ovimariva. Ozombura zokombanda yesere rimwe nḓa kapita, okambo oketjavari ko-Watchtower ka tja eṱe tu kambura kutja Jehova ongu vatera oviungura vyetu nokutja “eṱe kamaatu roro okuhehera ombatero kovandu” nu ngamba katu ya rora!​—Mateus 10:8.

Oviungura vyetu vi sutwa noviyandjewa vyouharupu. Ovandu ovengi ve tjaterwa i oviungura vyetu vyokuhonga ovandu Ombeibela, nu otji ve yandja oviyandjewa vyokutuvatera. Ovahongonone vaJehova oveni ve kara nondjoroka okuyandja oruveze rwawo, nomasa wawo, novimariva vyawo poo oviṋa vyarwe kokutja ve yenenise ombango yaMukuru mouye auhe. (1 Ekuruhungi 29:9) PEtuwo rOmerikotameneno na pomaworonganeno worukondwa na inga wotukondwa, pe noukesa ovandu mu ve yenena okuumba mo ovimariva tji mave vanga nao. Poo wina mave yenene okuyandja okupitira morungovi rwetu ndwi jw.org. Potuingi ovimariva mbi yandjwa vi za kovandu mbe he ri ovatumbe, mbe ri tjimuna omukazendu omuhepundu omusyona Jesus ngwa hungirira ko nawa, nu ngwa yumba oumariva uvari ouṱiṱi motjikesa tjovimariva. (Lukas 21:1-4) Okutja omundu auhe ma yenene ‘okupwika otjimariva’ kokutja ma yenene ‘okuyandja otja punga e rivangere momutima we.’​—1 Ovakorinte 16:2; 2 Ovakorinte 9:7.

Eṱe tu nongamburiro kutja Jehova ma kara ama hingi omitima vyovandu mbe nonḓero, ‘okumuyozika novitengakuhora vyovihape vyawo avihe,’ mokuvatera kutja oviungura vyOuhona vi yenenisiwe.​—Omiano 3:9.

• Otjikeṋa tji tji haṋa ongamburiro yetu ku inḓa ozarwe?

• Oviyandjewa vyouharupu vi ungurisiwa ku ye?