Testigos de Jehovátikia Yuús Papií nuyá Yuusnan áujmatainia papií nukap najankar tuke sukártiniaitji. Tura aintsank, ii irúntairisha tura ii mátsatkamuri Betelsha jeámniuitji, nuyá meserarain tusar pénker iisár iwiárniuitji. Betelnum takákmainiana nusha nuyá chikich nunkanam etsérkarat tusar akupkamu ainia nusha kuitjiai yayaíniaitji. Tura aintsank, ii yachí, ii umaí, warinsha nankámatsarmataisha kuítjiaincha yayaíniaitji. Nusha tuniá kuitjiainia túriniaitiaj?

Testigos de Jehovátikia kuit seámchaitji. Chikich iglésianmanka kuitian seamín áiniawai. Antsu Testigos de Jehovátikia kuit seámchaitji, tura kuitcha tímianu amastá tíchaitji. Yuús Papií Traducción del Nuevo Mundo najánamu tawai: “Ya kitiama nuka winití. Tura yaksha iwiaaku pujutai entsa umartaj takunka kuítchajai umarti” (Revelación 22:17). Entsa penké kuítchajai umútainia aintsank Yuusna nekaátniuka kuítchajainti. Agosto 1879 uwitin Étserma [La Atalaya] papiinium juní aarma jiinkímiayi: “Iikia kuit utsúmaji tusar seamuú wekaíshtatji”. Yamaisha áintsarik Testigos de Jehovátikia kuit seamuú wekaíchuitji.

Jehová takatrín najanki wéarat tusar yaksha ni enentaijiaink kuitian enkén áiniawai. Testigo de Jehováchuitiat Yuusa chichame etsérnaki weti tusar yaímkiattsar wakéruiniakka kuitjiai yaím wéarmai. Testigos de Jehovátisha ii kuítrijiaink tuinkish weri ashí nunkanam Yuusa chichame etsérniuitji (1 Crónicas 29:9). Ii irúntairin nuyá untsurí tuakmánumsha kuit enketai írunna nuisha yaksha ni wakérakka kuitian enkeámniaiti. Nuínchuka internetnum jw.org tana nuisha kuitian akupkámniaiti. Yaunchuk, nuwa waje Yuús enentáimtutainiam waniá kuit enketainiam jimiará centávochiniak takúrmakman ashí enkeámiania nuna Jesús pénker iísmiayi (Rúkas [Lucas] 21:1-4). Yamaisha aintsank, aya kuítrinniuk yaimin áiniatsui. Kuítrinchasha ni jéamujaink yaimin áiniawai. Yaksha ‘ni enentái̱n enentaimias’ kuitian akanák, Yuusna atí tusa susámniaiti (1 Kurintiunam 16:2; 2 Kurintiunam 9:7).

Jehová ni wakéramurin umirtuki wéarat tusa ikiakátmawitji. Ainis asamtai, ii enentaijiaink Yuusna takarsattsar ankánt sumámniuitji, tura ii kuítrisha súwitji. Nu túrakrin, Yuús wakérana nu uminkí wéawai (1 Timiutéun 6:18).

• Testigos de Jehovasha kuitian seamniuash ainia?

• Testigos de Jehová kuit enkeámujaisha itiurin ainia?