Mkul aseggas, d imelyunen n tezmamin i d-​nessufuɣ, ama d Adlis Iqedsen ama ţ-​ţiktabin nniḍen, yerna nferreq-​itent baṭel. Nbennu Tizeɣwa n Tgelda akk-​d Bitilat yerna nesseḥbibir fell-​asen. Neţṣerrif ɣef luluf n iεeggalen n Bitil akk-​d yemceggεen, yerna neţţak afus n lemεawna m’ara d-​teḥdeṛ twaɣit, am zzelzla. Ahat teqqareḍ-​as: “Ansi i d-​tekken yedrimen i wayagi meṛṛa?”

Ur neṭṭalab la leεcuṛ la tabzert, yerna ur nessutur ara idrimen. Γas akken leqdic-​nneɣ di ddunit kamel yesqamay-​aɣ-​d ɣlay, ur nessutur ara idrimen. Tazmamt tis snat n Lbeṛǧ n Tεessast i d-​yeffɣen akteṛ n lqern ayagi tenna-​d belli, imi numen s lemεawna i ɣ-​d-​iţţak Yahwa, d lmuḥal a nqelleb ɣef lemεawna n yemdanen. Ar ass-​a, neṭṭef deg wawal-​nneɣ!—Matta 10:8.

Leqdic-​nneɣ iţeddu s tukciwin i d-​ţţaken lɣaci seg wul. Aṭas n medden, iwumi yeεǧeb leqdic-​nneɣ n uselmed n Wedlis Iqedsen, i geţmuddun tukciwin ɣef ddemma n leqdic-​agi. Inagan n Yahwa s yiman-​nsen ţţaken s lfeṛḥ, ama si lweqt-​nsen, ama si tezmert-​nsen, ama seg yedrimen-​nsen neɣ seg wayen nniḍen iwakken ad iţwaxdem lebɣi n Ṛebbi ɣef lqaεa kamel. (1 Amezruy 29:9) Di Tzeqqa n Tgelda neɣ deg imukan anda i nxeddem igrawen, wid yebɣan ad fken kra zemren a t-​ssersen di tsendyaq n tukciwin. Amur ameqran n yedrimen ţţasen-​d sɣur wid ur nelli ara d imeṛkantiyen, am taǧǧalt-​nni taẓawalit i d-​icekkeṛ Σisa, imi tessers sin iṣurdiyen deg usenduq n tukciwin yellan di lǧameε iqedsen (lemqam). (Luqa 21:1-4) Ihi, yal yiwen ad “[yeţţarra] di rrif ayen iwumi yezmer” bac a t-​yefk “akken yenwa deg wul-​is.”—1 Ikurintiyen 16:2, Awal n tudert, 2001; 2 Ikurintiyen 9:7.

Netḥeqqeq belli Yahwa ad ikemmel ad iţdemmir wid yebɣan a ‘t-​εuzzen s lxiṛat-​nsen’ akken ad ţţaken lemεawna ɣef ddemma n leqdic n Tgelda, bac ad iţwaxdem lebɣi-​s.—Lemtul 3:9.

• Deg wacu i nemxallaf ɣef ddyanat nniḍen?

• I wacu i ṣelḥent tukciwin i d-​ţţaken medden seg wul?