Ka seng jong ngi ka pynmih bad sam da ki spah lak tylli ki Baibl bad kiwei de ki kot man la u snem khlem oh dor. Ngi shna bad pynbha ïa ki Ïing Hima bad ïa ki tnad treikam. Ngi kyrshan ïa ki hajar ngut kiba trei ha Bethel bad ïa ki mishoneri. Ngi ai jingïarap ruh ha ki por ba lyngshop ka mariang. Phi lah ban sngewphylla, ‘kumno la bei tyngka ïa kine baroh?’

Ngim ju pan kawei na ki shiphew ne ngim ju lum jingkynshew. Wat la ka jinglut ban kyrshan ïa ki nongïalap ka bun, ngim ju pan pisa na kiwei. Palat shispah snem mynshuwa, ka Kut Ap Phira kaba ar ka ong, ngi ngeit ba U Jehobah u kyrshan ïa ngi bad dei na kane ka daw ngin “ym khrong ne kyrpad na ki briew ban kyrshan ia ngi” bad ngim pat ju leh kumta!​—Mathaios 10:8.

La kyrshan ïa ki kam jong ngi da ka jingai mon sngewbha. Bun ki briew ki sngewnguh ïa ka jingai jinghikai Baibl jong ngi bad ki noh synñiang katba ki lah. Da ka jingkmen, ki Nongsakhi U Jehobah ki ai ïa la ka por, ka bor, ka pisa bad kiwei de ki jingkyrshan na ka bynta ban leh ïa ka mon U Blei ha satlak ka pyrthei. (1 Khronikl 29:9) Ha ka Ïing Hima bad ha ki jingïaseng asembli bad convention, ki don ki synduk ban noh synñiang bad kito kiba kwah ki lah ban ai katba ki mon. Lane phi lah ban noh synñiang lyngba ka website jong ngi, ka jw.org. Bunsien hi, ki jingnoh synñiang ki ju wan na ki briew kiba duna ka jingïoh, kumba la kren da u Jisu shaphang ka riewkynthei kaba duk, kaba ai tang ar damli. (Loukas 21:1-4) Te mano mano ruh ki lah ban “buh noh ha lade” barabor ban ai “katba u thmu ha la ka dohnud.”​—1 Korinth 16:2; 2 Korinth 9:7.

Ngi ngeit skhem ba U Jehobah un ïai pynkhihwin ïa ki dohnud jong kito kiba kwah ban “burom ia U Trai da la ka spah” khnang ban kyrshan ïa ka kam ïalap bad ban pyndep ïa ka mon jong u.—Proberb 3:9.

• Kaei kaba pynlong ïa ka seng jong ngi ban pher na kiwei pat ki niam?

• Kumno la pyndonkam ïa ki jingnoh synñiang?