Ɛvri ia, wi ɔganayzeshɔn kin mek ɛn sheb bɔku bɔku Baybul ɛn ɔda buk dɛn. Ɔl dɛn buk ya na fri. Wi kin bil nyu Kiŋdɔm Ɔl ɛn branch ɔfis dɛn. Ɛn wi kin mek ɛnisay we dɔn pwɛl pan di ol wan dɛn we wi gɛt. Wi kin kia bak fɔ ɔl di Bɛtɛlayt ɛn mishɔnari dɛn, ɛn kin sɛn tin dɛn to wi brɔda dɛn we trɔbul mit dɛn. Bɔt usay wi de pul di mɔni fɔ du ɔl dɛn tin ya?

Wi nɔ de aks fɔ tayt ɛn wi nɔ de pas plet. Pan ɔl we wi de yuz bɔku mɔni fɔ lɛ di prichin wok go bifo, wi nɔ de tɛl pipul dɛn fɔ pe wi. Trade trade, wan Wachtawa bin se na Jiova de ɛp wi, so wi “nɔ go ɛva beg ɛnibɔdi fɔ ɛp wi.” Ɛn frɔm da tɛm de, wi nɔ ɛva beg ɛnibɔdi fɔ ɛp wi!—Matyu 10:8.

Di mɔni we wi ɛn ɔda pipul dɛn kin gi, kin ɛp mek wi wok go bifo. Bɔku pipul dɛn kin lɛk di wok we wi de du ɛn dɛn kin gi smɔl tin fɔ ɛp kɛr di wok go bifo. Di brɔda ɛn sista dɛn kin gladi fɔ yuz dɛn tɛm, mɔni, ɛn ɔda tin dɛn fɔ ɛp mek di wok go bifo. (Fɔs Kronikul 29:9) Di Kiŋdɔm Ɔl dɛn gɛt bɔks dɛn usay ɛnibɔdi kin put ɔmɔs i want fɔ put. Ɔ if pɔsin want fɔ gi sɔntin, i kin go na wi Wɛbsayt we na www.pr418.com ɛn gi wetin i gɛt. Wi kin gɛt dɛn sem bɔks dɛn de na wi asɛmbli ɛn kɔnvɛnshɔn dɛn. Na pipul dɛn we nɔ jɛntri kin gi bɔku pan dɛn mɔni ya. Na di sem tin bin apin trade we Jizɔs bin de na di tɛmpul de wach we pipul dɛn bin de put mɔni insay di mɔni bɔks. I tɔk se wan po mami we put smɔl mɔni insay di bɔks, gi pas ɔlman. (Lyuk 21:1-4) So wisɛf “fɔ put sɔm mɔni wansay” so dat wi go gi ‘wetin wi mek ɔp fɔ gi.’—Fɔs Lɛta Fɔ Kɔrint 16:2; Sɛkɛn Lɛta Fɔ Kɔrint 9:7.

Wi biliv se Jiova go kɔntinyu fɔ mek pipul dɛn yuz ‘wetin dɛn gɛt’ fɔ ɛp mek dis prichin wok go bifo, so dat bɔku pipul dɛn go lan bɔt am.—Prɔvabs 3:9.

• Wetin mek wi ɔganayzeshɔn difrɛn frɔm ɔda rilijɔn dɛn?

• Wetin wi kin du wit di mɔni we wi ɛn ɔda pipul dɛn kin gi?