ပ​တၢ်​ကရၢကရိ​န့ၣ် ထုးထီၣ်​ရၤလီၤ​ဝဲ​လံာ်စီဆှံ​ဒီး လံာ်လဲၢ်​အဂုၤ​အဂၤ အ​ကကွဲၢ်​လၢ​အ​ကယၤ ကိးနံၣ်ဒဲး​လီၤ. ပ​လံာ်လဲၢ်​တဖၣ်​အံၤန့ၣ် ပ​ဟ့ၣ်​ကလီ​အီၤ​လီၤ. ပ​သူၣ်ထီၣ်​ဒီး ကွၢ်ထွဲ​ဘှီဂ့ၤ​ထီၣ်​က့ၤ ဘီမုၢ်ဘျီၣ်ဒိၣ် ဒီး​ဝဲၤတြၢ်​တဖၣ်​စ့ၢ်ကီး​လီၤ. ပ​ဆီၣ်ထွဲ​မၤစၢၤ ပှၤ​ဘ့ၤသ့လး​ဖိ​ဒီး မံးၡ့ၣ်နရ့ၣ်​လၢ​အ​ကထိ​တဖၣ် ဒီး​ပ​ကတဲာ်​ကတီၤ​တၢ်မၤစၢၤ​ဖဲ တၢ်ကီ​တၢ်ခဲ​ဖးဒိၣ် ဟဲ​အိၣ်​ထီၣ်ဝဲ​အဆၢ​ကတီၢ်​န့ၣ်​လီၤ. လၢတၢ်န့ၣ်​အဃိ ဘၣ်​သ့ၣ်​သ့ၣ်​န​က​သံကွၢ်​လၢ ‘ယဟိဝၤ​ယွၤ အ​တၢ်​ကရၢကရိ​အံၤ ဒိးန့ၢ်​ဘၣ်​ကျိၣ်စ့​လၢ တၢ်​သ့ၣ်​တဖၣ်​အံၤ​အဂီၢ်​ဒ်လဲၣ်’ န့ၣ်​လီၤ.

ပ​တ​ဃ့​တၢ်​ဆံဆဲၣ်​ပူ​တပူ, တၢ်ခိ​တၢ်သွဲ​ဒီး ပ​တ​ထၢ​တၢ်မၤဘူၣ်​ဘၣ်. လၢ​ပ​က​ဆီၣ်ထွဲ​မၤစၢၤ ပ​တၢ်​စံၣ်တဲၤ​တဲလီၤ တၢ်သးခု​ကစီၣ်​တၢ်မၤ​အဂီၢ် တၢ်​လၢာ်ဘူၣ်​လၢာ်စ့ၤ အိၣ်​အါမး​ဘၣ်ဆၣ် ပ​တ​ဃ့​တၢ်မၤဘူၣ်​ဘၣ်. ပူၤကွံာ်​အ​နံၣ်​လၢ အ​ကယၤဘျဲၣ်​န့ၣ်, တၢးထီခိးတၢ် လၢ​ဘၣ်​ထုးထီၣ်​အီၤ အဆိ​ကတၢၢ်​ခံဘ့ၣ်​တဘ့ၣ် ပာ်ဖျါ​ထီၣ်ဝဲ​လၢ​ပ​နာ်​လၢ ယဟိဝၤ​ယွၤ​က​ဆီၣ်ထွဲ​မၤစၢၤ​ပှၤ​ထီဘိ​အဃိ ‘တမ့ၢ်​လၢ​ပ​က​ဃ့ကညး ပှၤဂၤ​လၢ​က​ဟ့ၣ်​ပှၤ တၢ်မၤဘူၣ်​နီတဘျီ​ဘၣ်’ ဒီး​ပ​တ​ဃ့​တ့ၢ်​နီတဘျီ​ဘၣ်.—မးသဲ ၁၀:၈.

ပ​တၢ်ဖံး​တၢ်မၤ​န့ၣ် ဘၣ်​တၢ်​ဆီၣ်ထွဲ​မၤစၢၤ​အီၤ​လၢ တၢ်မၤဘူၣ်​လၢ​ပှၤ​ဟ့ၣ်​အီၤ​လၢ တၢ်​သးအိၣ်​န့ၣ်​လီၤ. ပှၤ​အါဂၤ​ဘၣ်သူၣ်​ဘၣ်သး​ဝဲ ပ​တၢ်ဒုး​သ့ၣ်ညါ​နၢ်ပၢၢ် လံာ်စီဆှံ​အ​တၢ်မၤ ဒီး​ဟ့ၣ်​တၢ်မၤဘူၣ်​လၢ တၢ်မၤ​အံၤ​အဂီၢ်​လီၤ. ပှၤအုၣ်​အသး​တဖၣ်​လၢ ဟီၣ်ခိၣ်​ဒီဘ့ၣ်​စ့ၢ်ကီး ဟ့ၣ်လီၤ​အ​တၢ်​ဆၢကတီၢ်, အဂံၢ်​အဘါ, အ​ကျိၣ်စ့​ဒီး အ​တၢ်စုလီၢ်​ခီၣ်ခိၣ်​အဂၤ​လၢ က​မၤ​ယွၤ​အ​တၢ်​ဘၣ်သး​အဂီၢ် လၢ​တၢ်သးခု​အ​ပူၤ​လီၤ. (၁ ကွဲးနီၣ်​တၢ် ၂၉:၉) ပှၤ​ပာ်​တၢ်မၤဘူၣ်​တလါ​တဖၣ် လၢ​ဘီမုၢ်ဘျီၣ်ဒိၣ်​ဒီး တၢ်​အိၣ်ဖှိၣ်​ဖးဒိၣ်​တဖၣ်​အ​ပူၤ​လီၤ. ပှၤလၢ​အသး​အိၣ်​ထၢနုာ်​တၢ်မၤဘူၣ်​န့ၣ် ထၢနုာ်ဝဲ​သ့​လီၤ. မ့တမ့ၢ် န​ဟ့ၣ်​ခီဖျိ​လၢ ပ​ပှာ်ယဲၤသန့ jw.org အ​ပူၤ​သ့ဝဲ​လီၤ. ပှၤလၢ​အ​ထၢနုာ်​တၢ်မၤဘူၣ်​တဖၣ်​န့ၣ် အါတက့ၢ်​မ့ၢ်ဒၣ် ပှၤ​မုၢ်ဆ့ၣ်​မုၢ်ဂီၤ​ဖိ​လီၤ. အဝဲသ့ၣ်​လီၤဂာ်​ဒ် မုၣ်ကမဲ​လၢ​အ​ဖှီၣ်​အယာ်​တဂၤ​လၢ တ့ၢ်လီၤ​ဝဲ​တိၢ်​ခံဘ့ၣ်​လၢ တၢ်လုၢ်ဟံၣ်​အ​စ့​ပာ်ဖှိၣ်​အလီၢ်​ပူၤ​လီၤ. ယ့ၣ်ၡူး​စံးပတြၢၤ​ဝဲ မုၣ်ကမဲ​တဂၤ​အံၤ​လီၤ. (လူၤကၣ် ၂၁:၁-၄) ဒ်​န့ၣ်​အသိး, ပှၤလၢ​အသး​အိၣ်​ဟ့ၣ်​တၢ်​န့ၣ် “ပာ်ဖှိၣ်​ပာ်​တၢ်” ဘၣ်​ဆၢ​ဘၣ်​ကတီၢ်​လၢ က​ဟ့ၣ်​တၢ်မၤဘူၣ်​အဂီၢ် “ဒ်​အ​တိာ်​ဝဲ​လၢ အ​သးကံၢ်​ပူၤ​အသိး” န့ၣ်​လီၤ.—၁ ကရံၣ်သူး ၁၆:၂; ၂ ကရံၣ်သူး ၉:၇.

ပ​နာ်​လၢ​ယဟိဝၤ​ယွၤ ကထိၣ်ဂဲၤ​ထီၣ်​ပှၤသး​လၢ​က ‘မၤ​လၤကပီၤ​အီၤ​လၢ အ​တၢ်စုလီၢ်​ခီၣ်ခိၣ်’ န့ၣ်​လီၤ. တၢ်အံၤ​က​ကဲထီၣ်​တၢ်​ဆီၣ်ထွဲ​မၤစၢၤ ဘီမုၢ်​တၢ်သးခု​ကစီၣ်​တၢ်မၤ ဒ်သိး​ကစၢ်​အ​တၢ်​ဘၣ်သး က​လၢပှဲၤ​ထီၣ်​အဂီၢ်​န့ၣ်​လီၤ.—ကတိၤဒိ ၃:၉.

• ပ​တၢ်​ကရၢကရိ​န့ၣ် လီၤဆီ​လိာ်သး​ဒီး တၢ်ဘူၣ်​တၢ်ဘါ​အဂၤ​တဖၣ်​ဒ်လဲၣ်.

• တၢ်မၤဘူၣ်​လၢ ပှၤ​ဟ့ၣ်​အီၤ​လၢ တၢ်​သးအိၣ်​အ​ပူၤ​န့ၣ် ဘၣ်​တၢ်​သူ​အီၤ​ဒ်လဲၣ်.