Mvula na mvula, nkubukulu ya beto kebimisaka bamilio ya Bablia na mikanda yankaka, mpe beto kekabulaka yau ofele. Beto ketungaka Bayinzo ya Kimfumu, babiro ya filiale, mpe beto ketaninaka yau. Beto kesadisaka mafunda ya bampangi ya dibuta ya Betele na bamisionere, mpe beto kesadisaka bantu na ntangu ya kisumbula. Kukondua ntembe, nge lenda kuyuvusa: ‘Wapi kekatukaka mbongo nionso yina?’

Beto kelombaka dime ve, mpe beto kesalaka bansisani ve. Atako kisalu ya beto ya kusamuna nsangu ya mbote kelombaka mbongo mingi, beto kelombaka bantu mbongo ve. Yameluta bamvula nkama mosi, nimero ya zole ya zulunalo Nkengidi tubaka ti beto mendima ti Yehova muntu kena sadisa beto, mpe ti beto “lenda ve kulomba to kusosa mbongo na bantu samu na kusadisa beto,” mpe beto melombaka mbongo ata kilumbu mosi ve!​—Matayo 10:8.

Kisalu ya beto mesimbama na makabu yina bantu kepesaka na luzolo ya bau mosi. Bantu mingi kesepelaka na kisalu na beto ya kulonga Biblia, mpe bakepesaka makabu samu na yau. Bambangi bau mosi diaka bakesepelaka kupesa na kiese ntangu na bau, ngolo na bau, mbongo na bau mpe bima na bau yankaka samu luzolo ya Nzambi salama na ntoto ya mvimba. (1 Bansangu 29:9) Na Yinzo ya Kimfumu, beto kele na bakesi ya makabu kisika yina bantu yina zola tula makabu lenda tula yau. To makabu lenda pesama na nzila ya site na beto, jw.org. Mbongo mingi kekatukaka na bantu kena mbongo mingi ve, bayina mefuanana na nketo yina ya nsukami mefuilaka bakala, yina Yesu kumisaka samu yandi tulaka mbongo ya bisengo zole na kesi ya makabu na tempelo. (Luka 21:1-4) Yau yina, muntu na muntu lenda “katula ndambu ya mbongo na yandi” samu na kupesa “mutindu yandi mekana na kupesa.”​—1 Bakorinto 16:2; 2 Bakorinto 9:7.

Beto mendima mpenza ti Yehova ketatamana kusimba bantima ya bayina mezola kukumisa yandi na ‘bima na bau ya mfunu’ samu na kupesa maboko na kisalu ya Kimfumu, samu luzolo na yandi kokisama.​—Bingana 3:9.

• Yinki kesuasikisaka nkubukulu ya beto na mabundu yankaka?

• Yinki mutindu mbongo ya makabu kesadiluaka?